WAN - Dayîkê ke seba vengê domananê xo bidê eşnawitiş, kuçeyan de rastê hêrişê polîsan ameyî û ameyî tepiştiş. Dayîkan dîyar kerd ke tîya ra tepya zî do seba aştîyêka mende têkoşîn bikerê.

 

Dimayê pêvînayîşê ke avûkatan 22ê gulane de bi Rayberê PKKyî Abdullah Ocalanî dir kerdî vengdayîşê peynîkerdişê grevê vêşanîye û rojeyê mergî ame kerdene. Dimayê vengdayîşî ra dima Leyla Guven, bi hezaran hepsî û xeylê çalakwanê cayê cîya û parlamenterê ke grevê vêşanîye de bî peynî grevê xo ardî. Dayîkê laçeg sipeyî yê ke xoverdayîşê xo aştîye de israr kenê, piştdayîş dayî vengdayîşî. Eynî wextî de Tevgerê Cinîyan ê Azad (TJA) zî bi vengdayîşê 'Ma bibê taqîbkerdoxê aştîyêka bi rûmet’ piştgirî dayî.

 

Şadîye Aktîya Meclîsê Dayîkê Aştîye ya Wanî de ca gêna, arde ziwan ke ganî hizur bêro awankerdene û wina va: "Ez sey dayîkêka 6 aşmî yo seba domanê ke grev de yê têkoşîn kena. Ma qetî çalakîyê xo de muracatê şîdetî nêkerd. Ma bi veng û laçegê xo xo ver da. Ma tewr peyîn domanê xo xelas kerd. La bipeynîyê grevan têkoşîn peynî nêbeno. Semedo ke temînatê aştî çin o. Ganî ma qetî têkoşîn ra peyser game nêerzê."

 

'Ma bi domananê xo dir têkoşîn kerd û ma serkewte bî'

 

Maya Sînan Salhano ke 143 roj grev de bi, Besra Salhane ke yew maya ke şîbî Enqere ya. Besraye arde ziwan ke bi domanê xo dir têkoşîn kerdê û serkewte bîyê. Wina va: "Ma 5 rojan Meclîs û dima ra Merkezê Pêroyî yê HDPyî nobetê xo dewam kerd. Ma xeylê rey ameyî derbkerdiş. Ma piştdayîş da domananê xo û ma serkewte bî."

 

'Aştîyêke bi rûmet bi têkoşîn mumkun o' 

 

Besraye arde ziwan ke aye tîya ra tepya zî semedê aştîyêke bi rûmet têkoşîn bikerê û wina va: "Pêro dayîkê ke bajarê cîya seba wedartişê tecrîdî têkoşîn kerdî. Ma nêeşkayne merdişê domananê xo temaşe bikerê. Aştîyêke bi rûmet bi têkoşîn mumkun a."

 

'Ma zî bi waştişê domananê xo bawer kerd'

 

Medîne Kiyaka ke lajê aye 86 roj grev de bi wina va: "Ez zî şîya Enqere. Ma her wext semedê aştîye bi umîd ê. Ma bi têkoşînê hempar zî reyke bîn ramojna. Girîng o yo ke ma tîy ara tepya aştîye de israr bikerê. Se beno wa bibo, ma domananê xo dir ê. Ma vera waştişê domananê xo rêzdar bî. Ma zî bî vengê waştişê înan. Ma umîd kenê ke her kes berpirsyarîyê xo bîyaro ca."