HESEKÊ - Resam Şêrîn Xelefa ke domanîya xo ra resamî ra hes kerdêne, pêro dej û xemê xo qelama xo û defterê xo rê pare kerdêne.

 

Resam Şêrîn Xelefe ya ke domanîya xo de dest bi viraştişê resiman kerdebî, semedo ke maya aye çin a, pêro hîsê xo bi rayîrê resiman vet meydan. Şêrîne wexto ke xemgîn bîne pêro xemgînîyê xo resim de ana ziwan û nêwazena ke dejê xo kesî ra vajo.

 

Resam Şêrîne, derheqê cuya xo de tay qalî kerde û wina va: "Wexto ke mi wendegehê rêjîmî de wendêne, ez sinifa 7ine de bîya. O wext Basil lajê Serekê Sûrîye Hafiz El-Esed cuya xo vindî kerdib, mamosteyê wendegehî ma ra waşt ke ma resimê Basilî viraznê. Wexto ke mi resimê ey viraşt û tay xemelna, kesê ke resimê mî dî şaş mendî û mi ra bawer nêkerdî."

 

'Dejê zerrîya xo ana ziwan' 

 

Şêrîne, dima ra dest bi viraştişê resimî kerde û wina qalî kerde: "O wext ra mi defterêke xo rê girewt û mi ser de resimê xo viraştî. Semedo ke resimê tim bi dej bî, qetî mi nêverdayne kes biewno defterê mi ra. Seba ke dej zerrîya mi de bi, mi nê dejî bi viraştişê resiman eşt teber. Yê ke tewr zêde dej ancenê cinî yê, coka resimê mi serê cinîyan de yê û mi qet rengê camêrdan xêz nêkerdo."

 

Tena defterê Şêrîne embazê aye bi 

 

Şêrîne arde ziwan ke domanîy axo ra heskerdişê maya xo ra dûr bîya û wina va: "Ez heskerdişê maye ra dûr a, semedo ke maya mi merd e. Destpêkê viraştişê resimê mi xoverikkerdişê maye ya domane aye yo. Mi xoverikerdişê maya xo nêdî. Resimêke bîn zî serê cinîya ke verê vayê xerîbî de vinderte yo. Resimêke bîn zî serê kênaya ke nîmeyê şewe de verike maya xo de ya. Xeylê resimê mi serê hîsê ke cuyena de yê."

 

'Şêrîne dûrê resamî kewte dimayê 15 serran ageyra'

 

Resam Şêrîne tewr peyîn qalîkerdişê xo de da zanayîş ke bi 15 serrî yo viraştişê resiman ra fek vera daya, semedo ke dejê maye dibî, wexto ke domanê aye virazyayî pêro cuya xo domananê xo rê visna û wina va: "Ez bi domananê xo dir eleqedar bîne. La nika reyna dest bi viraştişê resiman kena. Reyna babeta resimanê mi benê cinî, şewe, asmen û ûsn. Her cinî dejêke aye esto."