ŞIRNEX - Zîndanê Tîpa Tyî yê Şirnexî de hepsîyê ke çalakîya xo peynî kerdbî wedarîyabî nêweşxane û badê ke tedawîya înan ameybî kerdene tepîya erşawîyabî zîndan. Hepsîyê ke badê tedawî tepîya erşawîyabî zîndan ra Zeynep Mete û Rojda Topçu dejê çiman û made vera reyna wedarîyayî nêweşxane.

 

Badê vengdayîşê Rayberê PKKyî Abdullah Ocalanî hepsîyan grevê vêşanîye û rojeyê mergî qedîna û nêweşxaneyî rê ameyî sewqkerdene, kontrolê înan ê weşîye hewna dewam kenê. 22 hepsîyê ke Zîndanê Tîpa Tyî yê Şirnexî tarîxanê cîya-cîyayan de kewtbî grevê vêşanîye badê vengdayîşê Rayberê PKKyî Abdullah Ocalanî çalakîya xo ya grevê vêşanîye peynî kerdî û wedarîyayî Nêweşxaneyê Dewlete yê Şirnexî. Hepsîyê ke badê tedawî tepîya erşawîyabî zîndan ra Zeynep Mete û Rojda Topçu dejê çiman û made vera reyna sewqê nêweşxane ameyî kerdene.

 

Zeynep û Rojda 13ê Adare ra nata çalakîya grevê vêşanîye de bî.

 

Sewbîna hepsîyo bi nameyê Agît Bîlîkeyo ke ameybî taburcukerdene zî dejê made û çiman vera vizêr reyna sewqê nêweşxane ameybî kerdene. Agîtî 16ê çeleyî de dest bi çalakîya rojeyê vêşanîye kerdbî.