MÊRDÎN - 104 hepsîyê Zîndanê Mêrdînî yê ke grevê vêşanîye de bî muayeneyêkê pêroyîyî ra dima amebi vatene êyê ke rewşa înan giran a do sewqê nêweşxaneyî bêrê kerdene. Rixmê nê sozî de zî vizêr ra nata yew tepişte zî sewqê nêweşxaneyî nêameyo kerdene.

 

Zîndanê Tîpa Eyî yê Mêrdînî yê Girewteyî de 104 tepişteyî kewtîbî grevê vêşanîye. Dimayo ke grev qedîya ame vatene êyê ke halê înan giran o do bêrê berdene bi nêweşxane. Labelê ame zanayene ke vizêr ra yew kes zî sewqê nêweşxaneyî nêameyo kerdene. Avûkatanê ÎHDyî yê ke heyetê Çimdarîya Grevê Vêşanîye awan kerdibi seba halêkê sewqkerdişî verê zîndanî de pawenê.

 

Bayram Demîr, Bariş Akkûş, Zana Yilmaz, Bîrdal Abay û Mehmet Şerîf Demîrtaşo ke 142 rojî yo grevê vêşanîye de yê, ameyêne pawitene ke sewqê nêweşxaneyî bêrê kerdene. Avûkatan vizêr muwekîlanê xo dir pêvînayîş kerdibi, ardibi ziwan ke halê tepişteyan giran o.

 

Grev de 9 cinîyî estbî

 

Tepişteyan dimayê muayeneyê pêroyî seba şîyayîşê nêweşxaneyî waştişname dabi zîndanî, avûkatanê ÎHDyî derheqê na babete de zî nê hayîdarîyî dayî: “Koxuşa cinîyan de 9 embazî estê. Doktorê ke sazî û nêweşxaneyî ra şîyê tepişteyanê ke bi zor payanî vindenê, nêeşkenê rayra şirê, gonî virêjenê ra vato ke ê do înan bieşrawê nêweşxane û wa teberê wero ke înanê bînan rê yeno şirawitene sewbîna çîyêk mewerê. Gereyê embazan ê sey ulser, nêrehetîya velkeyan, dejayîşê sereyî estê û naye ra embazî qetîyen wazenê ke bêrê kontrolkerdene. Îhtîmal esto ê plan kenê embazê ke 140 rojî ra vêşêr o grev de bî bere nêweşxane. O zî tena îhtîmal o. Ma zî seba kerdişê sewqî pawenê.”