AMED - Amed de cinîyê esnaf dîyar kerdî ke seba dukanê xo nêgîrê xo ver danê û dîyar kerdî ke krîzê ekonomî tena serê cebê înan ney, psîkolojîyê înan zî tesîr kerdo.

 

Tirkîya de krîzê ekonomî her ke şino giran beno, tewr zêde tesîr serê cinîyan keno. Cinîyê esnafê dayîş û girewtiş yê Galerîyayî dîyar kerdî ke ê seba dukanê xo nêgîrê xo ver danê û vera krîzê ekonomî têkoşîn kenê.

 

Cinîya bi nameyê Zelîha Tantekînya 40 serrî ke 15 serrî Galerîayî de esnafî kena, da zanayîş ke no merkezo ke verê tewr qerebalix bi nika tena 10 esnaf ci de estê û wina va: "Ez dukana xo 08.00an heta 19.00an akerde verdena. 11 saetan de tena çend muşterî yenê. Ma nêeşkenê çîyêk biroşê. Verê krîzê dukanê ma deqeyê ke veng nêmendêne."

 

'Tesîr psîkolojîyê ma zî kerdo'

 

Zelîhaye arde ziwan ke krîzê ekonomî serê psîkolojîyê înan zî kerdo û seba nê rewşa esnafan, keye û komel zî bi tesîr bîyê. Zelîhaye tewr peyîn qiseykerdişê xo de ard ziwan ke sebebê krîzî şer o, sîstemêke newe zî bi vurnayîşê hukmatî mimkun o.

 

'Ma xêrê turîstan serê lingan de yê'

 

Halîde Kaçmaza ke Berê Koyê yê Sûrî de dukana aye Bîjuterî esto, wina va: "Rewşa cinîyanê esnaf xora zehmet o, Krîzê ekonomî zî zêde bîyo û xeylê esnafê cinî seba nê dukanê xo girewtî. Dukanê ma nika bi xêrê turîstanê Îranî serê lingan de yo."

 

'Krîzî tesîrêke pîl kerd'

 

Berfîn Aktaşe zî verê Halîde Kaçmaze xebityena, dîyar kerde ke verê krîzî cinî bê girewtiş dukanan ra nêvejîyayne û va krîzê ekonomî tesîrêke pîl serê cu de kerdo.

 

'Ma bi zehmetî cuye xo dewam kenê'

 

Fatma Esene zî da zanayîş ke înan seba ekonomîya xo Eskîşehîr ra koçê Amedî kerdê û 10 serrî yo kuçeyê Sûrî de xişirê ke ê viraznenê roşenê. Fatmaye wina va: "Eskîşehîr de seba krîzê ekonomî ma kar nêdîne. Ma tîya bi zehmetî serê lingan de vindenê. Krîzî tena cêbe ma ser tesîr nêkerd eynî wextî de psîkolojîyê ma zî serûbin kerd."