STENBOL - Nobeta keyeyanê hepsîyan ya Gebze, roja 47ine de ya û keyeyan da zanayene, heta ke tecrîd nêro wedaritene ê do çalakîya xo dewam bikerê.

 

Merdim û dayîkê hepsîyan seba ke bibê vengê domananê xo yê ke grevê vêşanîye û rojeyê mergî  de yê, 9ê Nîsane ra nata vernîya Zîndanê Tîpa Myî yê Gebze de ‘Nobeta Çalakîye’ virazenê. Keyeyê hepsîyan semedê astengkerdişî polîsan banê Rêxistina HDPyî ya Gebze de çalakîya xo ya nobete dewam kenê. Xeylî hemwelatijî û avûkatanê Komeleya Huqûnasanê Azadan (OHD) paştdayîş da keyeyan.

 

Dayîka Newroz Bozkûrta ke 1ê Adare ra nata Zîndanê Gebze de grevê vêşanîye de ya Sûltan Bozkûrte, çalakîya nobete de qisey kerde û wina va: “Bi her hawayî ma bi hêz û bi moral ê. Her ca de çalakîyî dewam kenê. Ma paweyê ke eşkerayîye bêra dayene. Heta ke tecrîd nêro wedaritene ma do çalakîya xo dewam bikerê. Ma heta peynîye peyê waştişanê xo de yê. Waştişê domananê ma waştişê ma yê. Eke grevê vêşanîye biqedîyo zî, ma do nêweşxaneyan de û her ca de leyê domanê xo de bibê. Ma dest têkoşînî ra nêverdanê.”

Eşkerayîye ra dima keyeyan dest bi çalakîya roniştişî kerd û ê do çalakîya xo heta saetanê şewe dewam bikerê.