ENQERE - Nevîn Yildirima ke vera hêrişo zayendî de xopawitişê cewherî pê arde û camêrdo ke hêrişê aye kerd kişte, 7 serrî yo ke zîndan de tewqîfkerde yena muhakemekerdene. Cezaya Nevîn Yildirime ya muebetî hetê 1. Daîreya Cezaya Dadgerî ra ameye tesdîqkerdene.

 

Nevîn Yildirime 28ê tebaxa 2012î de dewa Korukaya ya Yalvaçî ya Ispartaye de xopawitişê cewherî pê arde û camêrdo bi nameyê Nurettîn Gîderî ke vera aye de hêrişo zayendî yê sîstematîk pê ard, kişte. Muhakemeya ke camêrdan her tewirê şîdeto ke bi cinîyan yeno kerdene, rewşa baş, tahrîko bêheq û xeylê çîyan ra cezaya înan fînena war, çîyê ke Nevîn Yildirime cuyaya û cuyena nêvînena. Mehkema cezaya muebbetî dabî Nevîne.

 

2015î de cezaya muebbetî ke dîyabî Nevîne ameybî xirakerdene û 3ê Çeleyê 2018î de doza aye Mehkemaya Cezaya Giran ya Yalvaçî de newe ra ameye vînayene. Labelê netîceyê muhakemekerdişê newe de reyna cezaya muebbetî dîya Nevîne. Dima ra dosyayê Nevîne reyna erşawîya dozgerî. Na reye Serdozgerîya Komarî vînayîşê xo arde ziwan ser ke qeraro ke Mehkemaya Cezaya Giran ya Yalvaçî dayo bêro xirakerdene û erşawite 1. Daîreya Cezaya Dadgerî. 16ê gulane de roniştişê doze pê ame û roniştişê doze taloqê 23ê gulane ame kerdene. Nevîne roniştişê siba de azadîya xo waşte û qala xeberanê derheqê xo, vindetişê mehkema û piştîya cinîyan kerde.