Yeşîm Oruç 

 

ANTALYA - Nevîn Yildirima ke vera hêrişo zayendî de xopawitişê cewherî pê arde û camêrd kişt, 7 serrî yo ke zîndan de tewqîfkerde ya. Nevîn Yildirime herinda ke qala prosesê muhakemekerdişî  bikera, qala problemanê ke cuyena  kerde û mesaj şirawite cinîyan rê. Nevîne wina va: “Wa cinî bawer bikerê ke ê eşkenê cuye awan bikerî. Wa tay kesan seba xo sey kesê ke înan bixelisnî nêvînî. Wa tama cuye bivejnî û kêfweş bî.”

 

Nevîn Yildirime 28ê tebaxa 2012î de dewa Korukaya ya Yalvaçî ya Ispartaye de xopawitişê cewherî pê arde û camêrdo bi nameyê Nurettîn Gîderî ke vera aye de hêrişo zayendî yê sîstematîk pê ard, kişte. Muhakemeya ke camêrdan her tewirê şîdeto ke bi cinîyan yeno kerdene, rewşa baş, tahrîko bêheq û xeylê çîyan ra cezaya înan fînena war, çîyê ke Nevîn Yildirime cuyaya û cuyena nêvînena. Mehkema cezaya muebbetî dabî Nevîne.

 

2015î de cezaya muebbetî ke dîyabî Nevîne ameybî xirakerdene û 3ê Çeleyê 2018î de doza aye Mehkemaya Cezaya Giran ya Yalvaçî de newe ra ameye vînayene. Labelê netîceyê muhakemekerdişê newe de reyna cezaya muebbetî dîya Nevîne. Dima ra dosyayê Nevîne reyna erşawîya dozgerî. Na reye Serdozgerîya Komarî vînayîşê xo arde ziwan ser ke qeraro ke Mehkemaya Cezaya Giran ya Yalvaçî dayo bêro xirakerdene û erşawite 1. DaîreyaCezaya Dadgerî. 16ê gulane de roniştişê doze pê ame û roniştişê doze taloqê 23ê gulane ame kerdene. Nevîne roniştişê siba de azadîya xo waşte û qala xeberanê derheqê xo, vindetişê mehkema û piştîya cinîyan kerde.

 

'Vindetişê mehkema qels û hetgir o'

 

Nevîn Yildirime mesajê xo de va ‘Ganî cinîyî wayîrê doze bivejîyî û piştîdayîşê cinîyan seba mi xeylê baş o’ û wina domanaye: “Piştîdayîşê cinîyan mi tena vera nêda. Vengê mi dayî eşnawitene. Vindetişê mehkema qels û hetgir o.”

 

'Xeberan de ca bidêne îdîayanê hetê bînan'

 

Nevîn Yildirime  qala xeberê ke derheqê aye de ameyî kerdene kerde û wina va: “Mi prosesê muahkemekerdişê xo de xeberanê ke derheqê mi de ameyî viraştene taqîp kerde, la çîyê ke maeyî nuştene raşt nîyî. Ca dîyeno îdîayanê bêbingeh yê hetê bînan. Çîyê ke mi cuyayî nînê vatene. Mi hetê xovatişî de xeylê probleman cuya. Hende girano ke ez nêeşkayêne qala çîyê ke cuyaya bikera. Ez êdî nêwazena derheqê îstîsmaro zayendî de qisey bikera. Çimkî ez xeylê pelçiqîyaya. Prosesê muhakemekerdişî de zî çîyê ke mi waşt ez biwaja estbî. Labelê mi nêva. Hema xeylê çî zerrîya mi de estî. La hêzê mi yê ke ez vaja çin o. Hetê psîkolojîkî de tay bo zî mi xo arê da. Cok ra ez nêwazena agêra tepîya.”

 

Nevîne mesaj erşawit cinîyan rê

 

Nevîne tewr peynî mesaj erşawit cinîyan rê û va: “Wa cinî bawer bikerê ke ê eşkenê cuye awan bikerî. Wa tay kesan seba xo sey kesê ke înan bixelisnî nêvînî. Wa payanê xo ser de bivinderî.  Wa çîyê xirab ke ameyî serê înan bivajî. Wa nêtersî. Cinîyê bînî zî estî. Wa tama cuye bivejnî û kêfweş bî. Destanê xo piştîdayîşî ra meancêne.”