Rengîn Azîzoglu

 

AMED - Hepsîyo bi nameyê Ramazan Tanriverdî seba problemê weşîye nêkewt grevê vêşanîye la refakatîyê hepsîyê bîn ê grev de yê keno.

 

Cinîye ey Hanim Tanriverdî, dîyar kerde ke dinya zana, Erdogan zano, bi vêşanîye îradeyê înan nîno şiktayîş û va: "Bi merdiş, tepiştiş û şîdet Kurd nêqedênê. Peynî pêro şeran aştî ya, wa êdî aştî bibo."

 

Çalakîya grevê vêşanîye ya hemsereka KCDyî û parlamentera HDPyî ya Colemêrgî Leyla Guvene ke bi amancê wedartişê tecrîdê serê Rayberê PKKyî Abdullah Ocalanî da destpêkerdiş, roja 195ine de dewam kena. 1ê Adare de zî pêro zindanan 7 hezarî ra zêde hepsî çalakîya xo dewam kenê. 30 hepsî zî kewtî grevê rojeyê mergî.

 

Zindanê Tîpê T yê Amedî de hepsîyo bi nameyê Ramazan Tanriverdî zî hepsîyan rê refakatî keno. Ramazan 27 serrî yo zindan de yo û semedo ke nêweş bi nêeşka bikewo grev. 

 

Cinîya ey Hanim Tanriverdî da zanayîş ke Ramazan seba problemê weşîye nêkewto grev û wina va: "Ramazan di rey madeyê xo ra emelîyat bi. Reyke zî qelbê xo ra emelîyat bîyo. Embazan vato ke hêzê to çin o mekwe ci. Nika o mird o, rewşa ey baş a. Moralê embazê ke grev de yê baş o. La bedenê înan roj bi roje helîyeno. Lazimîyê xeylê embazan bi ca nêanê. Awa bi şekir zî nêdanê înan. Dinya zana, Erdogan zî zano, îradeyê înan nîno şiktene. Wa êdî merdiş çinbê. No zulm het aça do dewam bikero. Her mayêka domanê xo bi zor û zehmetî pîl kerda. Bêşik domanê ma bê sebeb nêkewtê grev. Ma heqê xo wazenê."

 

'Çîyêk bi ciwanan bibo do kam hesab bido' 

 

Hanime bale ante tecrîdê serê Abdullah Ocalanî û va tecrîd tena serê Ocalanî de nîno kerdene û va 27 serrî yo verê berê zindanan de ya, tecrîd zaf baş zana. Hanime bale ante serê rewşa hepsîyê ke grev de yê û arde ziwan ke eke çîyêk bi ciwanan bibo do kam hesabê nê bido û Kurdê ke piştdayîş danê Erdogan zî hemkarê nê zulmî yê.