MÊRDÎN - Gurbet Ektîrena ke dimayê ameya tahlîyekerdene zî keyeyê xo de grevê vêşanîye dewam kena û roja 127ine çalakîya xo de ya. Maya aye Rekîya Ektîrene ke keye de bi kêna xo dir eleqedar bena, dîyar kerde ke kêna aye her roje verê çimê aye de helîyayena û wina va: "Mayê bîn teber de, ez zî zere de xo ver dana." Gurbete zî da zanayîş ke heta tecrîd nêro şiknayîş, do çalakîya xo nêqedêno.

 

Çalakîyê grevê vêşanîye yê bi amancê tecrîdê serê Rayberê PKKyî Abdullah Ocalanî bêro wedartiş, zindanê herêm û Tirkîya de ameyî destpêkerdiş. Eynî wextî de 30 hepsî zî grevê xo vunayî rojeyê mergî. Hepsîyê ke nê prosesî de ameyî tahlîyekerdiş zî keyeyê xo de dewam kenê. Gurbet Ektîrene 15ê Çele de zindanê Bakirkoy, de dest bi grev kerde û 8ê Adare de amî tahlîyekerdiş, nika çalakîya xo keyeyê xo Şemrexê Mêrdînî de dewam kena.

 

Rekîyaye va kêna aye verê çimanê aye de helîyena û va lajê aye zî Stenbol de zindan de grev de yo û va ê nêwazenê mayî bibermê û wina va: "No prosesî de reyna bi mayan û Kurdan beno. Bi merg çîyêk çareser nêbeno. Wa kezeba mayan zêde nêveşîyo. Ganî seba çareserî game bêro eştene. Kêna mi Gurbete tîya helîyena. Ma tîya nêeşkenê werd biwerê. Di domanê mi vêşanê. Gelo na kezeb nîya?"

 

'Xoverdayîşê mayan beno moral'

 

Gurbeta ke roja 127ine çalakîya xo de ya va ke aye mesajê ke zindan ra yenê û xoverdayîşê mayan ê wareyan de moralêke pîl gêna û wina va: "Amancê çalakîya ma hetê her kesî ra yena zaneyen. Ez zî zindanê Bakirkoyî de menda. Ez uca de 52 rojan grev de menda. Dimayê ke vejîyaya keyeyê xo de dewam kena. La seba ke ez ameya xemgîn bîya. Coka mi çalakîya xo keye de dewam kerde. Heta tecrîd nêro şiktiş, do no xoverdayîş peynî nêbo. Ez veng dana şarê Kurdî, ganî tu kes vera nê zulmî bêveng nêmano. Amancê pêvînayîşê 2ê Gulane zî no bi îradeyê ma bêro şiknayîş. La heta ke tecrîd pêruyî de nêro wedartiş do çalakîya ma dewam bikera."