AMED - Mayê tepişteyanê ke grevê vêşanîye û rojeyê mergî de yê sifreyê rîyêerdî de ameyî têhet, fitarîya xo tena bi şimitişê awe kerde. Mayan waşt ke waştişî tavilî bêrê bicaardene.

 

Bi serkêşîya Organîzasyonê Bajarê Amedî yê Partîya Şaran a Demokratîke (HDP) bi wesîleya Aşma Remezanî Parkê Roboskî yê Kayapinarî de “sifreyê rîyêerdî” ame ronayene. Mîyanê înan de mayê ke domanê înan grevê vêşanîye û rojeyê mergî de yê zî tede, hemserekê HDP’yî yê Bajarê Amedî Zeyyat Ceylan, parlamenterî Remzîye Tosûne û Mûsa Farisogûllari û xeylî hemwelatijî fitarîye rê nîm saet bimano ameyî park.

 

‘Wa waştiş bêrê qebulkerdiş'

 

Verê fitarîye maya Îhsan Topûzî yo ke 1’ê Adare ra nata Zîndanê Wanî yê Tîpê F’yî de grevê vêşanîye de yo Halîme Topûze bale ante serê grevanê vêşanîye û rojeyê mergî ser û vat, “Ma roje yê, la domanê ma grevê vêşanîye de yê. Na yewe ra ma nêeşkenê çîyêk biwerê. Ê vêşan bê ma do zî vêşan bimanê.”

 

Mayan rixmo ke roje bîyî çîyêk nêwerdî, tena bi şimitişê awe fitarîya xo kerde.

 

Dima ra tayê hemwelatijê ke bi erbaneyanê xo ameyî park, bi erbaneyan deyîra “Zindana Dîyarbekir”î vate û sloganê “Biciwîyo xoverdayîşê zîndanan” û “Amed mekewe ra veng bide zîndanan” eştî.