STENBOL - Çalakîya keyeyê hepsîyan ya Esenyûrtî roja 24. de dewam kena. Keyeyan vera astengîyê polîsan de çalakîya rayîrşîyayîşî pê ardî. 

 

Çalakîya roniştişî ya mayan û keyeyanê hepsîyan a seba şikitişê tecrîdê giranî yê serê Rayberê PKKyî Abdullah Ocalanî û paştdayîşê grevanê vêşanîye û rojeyê mergî ya Meydanê Esenyûrtî yê Stenbolî roja 24. de dewam kena. Keyeyanê hepsîyan awanîya Partîya Demokratîke ya Şaran (HDP) ra heta Esenyurtî rayîr şîyî.

 

Girseyo ke keyeyanê hepsîyan yê bînan reyde arê bîyî, demêk bankê dorme ser de roniştî. Keyeyanê hepsîyan dima ra dest bi çalakîya roniştişî kerdî û hetê polîsan ra girîyayî binê ablûqayan. Polîsan kamîya kesê ke çalakî pê ardî pers kerdî û înan GBTyî ra derbaz kerdî.

 

Hemwelatîyê ke waştî babete bimusî, hetê polîsan ra ameyî îqazkerdene û hemwelatîyêk ame tehdîtkerdene. Hemwelatîyo ke hetê polîsan ra ame tehdîtkerdene va: “Ez tîya ra derbaz bîyêne û mi tîya wina dî. Cok ra mi waşt ke ez bipersa.” Polîs zî hemwelatî rê va ‘Aye wext êdî tîya ra derbaz mebe.’

 

Badê ke keyeyan kamîya xo polîsan ra girewtî awanîya HDPyî ya Esenyutî ra dest bi rayîrşîyayîşî kerdî. Çalakîya rayîrşîyayîşî de siloganê hîsgerîye yê grevê vêşanîye ameyî berkerdene.