STENBOL - Ame zanayene ke 4. Hûmara Zîndanê Şakranî de eştî koxuşanê hepsîyanê sîyasîyan ser û dest ronîyayo heme malzemeyanê cuye yê hepsîyan ser.

 

Çalakgerê grevê vêşanîye Yusuf Ozdemîrî da zanayene ke bi nameyê sahnekerdişî heme malzemeyê înan ê cuye dest ra ameyê girewtene. Yusuf Ozdemîr wexto ke Unîversîteya 9 Êlule ya Îzmîrî de Beşê Hemşîreyîye wendêne serra 2009î de ame girewtene. Yusufo ke 15 serrî û 6 mengê ci rê ceza ameya birnayene, seba wedaritişê tecrîdî 2. Hûmara Zîndanê Tîpa Tyî yê Şakranî de 76 rojî yo grevê vêşanîye de yo.

 

Pîyê Yusufî va: “Dest nayo serê heme malzemeyanê cuya. Teyna cilê înan apey dayê înan. Newresîmê cilan zî nêdayê înan. Lajê mi xora grev de bi. Nika nêzana rewşa ey senên a. Seba ke lajê mi bi rayîrê telefonî qisey kerdo, zanayîşî zelal nêdayê. Tecrîd sûcêkê merdimîye yo. Ma leyê xoverdayîşê domananê xo de yê. Bedel çi beno wa bibo, ma leyê înan de yê.”