MERKEZÊ XEBERAN - Dewaya qetilkerdişê 3 cinîyan ê Kurdan ê ke 2013 de paytextê Fransa Parîs de ameyî qetilkerdene kewte merheleyêka newî.

 

Goreyê zanayîşan seba ke rolê înan komiştişê Parîsî de esto derheqê Teşkîlatê Îstîxbaratî yê Tirkî MÎTî de cipêrsayîş dest pêkerd.

 

Keyeyê hîrê sîyasetmedarê ke ameyî qetilkerdene, Adara 2018an de muracat kerdibî û waştibî, yê ke fermanê komkiştişê dayî û hemkarê înan tewirbîyayîşê cigêrayîşî bêrê kerdene.

 

Avûkat Jean-Louis Malterre yo ke ANFyî rê qisey kerd da zanayene ke derheqê rolê MîTî de cipersayîş ame destpêkerdene.

 

Melterre ard ziwan ke adeletî qebûl kerd ke engişta servîsanê Tirkan nê komkiştişî de esto û va: “Dewaya verêne bi qetilkarî Omer Gunayî bisinor bî, la heman dosya de rolê mîtî eşkera ame tesbîtkerdene.’’

 

Avûkat Antoîne Comte yo ke Ajansê Xeberan ê AFPyî yê Fransa rê qisey kerd, va: “No qewimîyîşêko tarîxî yo, hinî ê ke teber ra talîmatê qetilkerdişî denê, bêceza nêmanênê.”

 

Komkiştiş 9ê Çele ya 2013 de merkeze Parîsî de ame kerdene. Ronayoxanê PKKyî ra Sakîne Cansize (Sara), temsîlkara KNKyî Fîdan Dogane (Rojbîne) û endama Têgêrayîşê Ciwanîye yê Kurdan ra Leyla Şaylemeze (Ronahî) ameybî kiştene.

 

Omer Gunayo ke sey tek qetilkarî zindan de bi, çend hewteyî dewaya vere peynîya 2016î de zindan de bişik merd û dewaya ci ginaye war. La merdimanê hîrê cinîyan û Kurdan peynîya dewaye canêverda û waşt ke înan ke talîmatê komkiştî dayo vejîyê werte. 12’ê Adar a 2018’î de  pêhesnayîşê sûcî ame kerdene.