AMED - Rejîsor Kivilcim Akaya ke bi belgefîlmê xo yê ‘Amîna’ ke cinîyê koçber ê Afrîka qalî kena, beşdarê Festîvala Belgefîlman ê FîlmAmed bî, dîyar kerde ke ganî cinî tewr zêde sînema de ca bigîrê, seba ke xeylê çî estê ke cinî qalî bikerê estê.

 

7in Festîvala Belgefîlman ê FîlmAmed, Amed de Merkezê Kongre û Kulturî yê Şaredarîya Bajarê Gird ya Amedî de dest pêkerd.  Asya, Latîn Amerîka, Ewropa û Rojhelato Mîyanên ra 20 ci ra cinî, pêroyî de 42 fîlmê hunermendan beşdarê mîhrîcanî bî. Yew nê belgefîlman ra zî ‘Amîna’ ê rejîsor Kivilcim Akaye bî.

 

Kivilcime rejîsorêka Kurd a, Stenbol de cuyena, Xebatanê xo uca de meşnena. Kivilcime cuya cinîyê koçber ê Afrîkayî meraq kena û na mabêne de Amîna nas kena. Pêşnîyarî bena Amîna rê û aye zî qebûl kena. Kivilcime dîyar kerde ke multecî şertê zehmet de cuya xo dewam kenê û va aye waşto ke empatîyêke bêro awan kerdene.

 

'Bi ekîbêke pîl ê cinîyan dir xebate amî meşnayîş'

 

Kivilcime va Amîna 2013an de nas kerda, 2016 de aye kerda kapaxê kovare û dimayê kovare aye waşto ke hîkayeyê cinîyanê Afrîkayî bikero sînema. Kivilcime arde ziwan ke ê bi ekîbêke pîl cinîyan dir xebityayê.

 

'Ma hewl danê ke sînema de bibê'

 

Kivilcime da zanayîş ke hûmara cinîyan sînema de zêde bena û va reyna zî na hûmare bes nîya û wina va: "Esasê xo de cinî xebityenê la viraştiş de, rejîsorî de cinî wayîrê vatişî de ca nêgênê. No zî keweno serê milê ma cinîyê ke nê pîyase de yê. Çi destê ma ra yeno ganî ma bikerê û ma hewl danê ke girs bikerê. Ganî cinî tewr zêde sînema de ca bigîrê. Ganî ma dinya perspektîfê camêrdan rê nêverdê."

 

Kivilcime tewr peyîn qalîkerdişê xo de arde ziwan ke prosesê kaosî de ganî hunermendî bêveng nêmanê û va: "Ma pêro nê welatî de yê. No proses tesîr serê ma pêro de kerd. La ez bawer kena do zaf çîyê baş zî bibê."