AMED - Viyan Hevjîn Morkuzu ke Zindanê Şakranî de grev de ya û eynî wextî de nêweşa tuberkulozî ya, ame zanayîş ke rewşa aye zaf xirab a. Dedê aye Mehmet Morkuzu wina va: "Vîyanê xatir ma ra waşt. Tersê ma pîl o. Ganî bikewê tevger. Domanî mirenê. Wa veng bidê vengê înan. Ganî hukmat waştişan bivîno."

 

Çalakîyê grevê vêşanîye ke bi amancê wedartişê tecrîdê Rayberê PKKyî Abdullah Ocalanî ser o bêro wedartene, bi rayberîya hemsereka KCD û parlamentera HDPyî ya Colemêrgî Leyla Guvene ame destpêkerdene, 1ê Adare ra dima pêro zindanan de vila bi. Yew hepsîya ke vera tecrîdî kewte grev Vîyan Hevjîn Morkuzu ya ke 3 serrî yo hepsîya û nika zindanê Şakranî de manena.

 

'Rewşa weşîye aye xirab bî'

 

Vîyane Amed de ameya dinya û Unîversîteya  Dîcle ra mezûn bîya. Vîyana ke beşdarê eşkerayîye prostestokerdişê qetilkerdişê wendekarê unîversîteya Dîcleyî Aydin Erdemî ke 6ê Kanûna 2009an de ame qetilkerdiş, bî, amî tepiştiş û serbest amî veradayîş. Dimayê ke unîversîte qedêna Mûş de dest bi wezîfe kerde û seba ke endama Egîtîm Senî bî rastê mobbîngî amî. Vîyan çend serrî dima bi eynî dosya reyna amî tepiştiş.

 

 'Ganî hukmat waştişan bivîno'

 

Dedê aye Mehmet Morkuzu, da zanayîş ke rewşa weşîye Vîyane zaf xirab a û va Vîyane telefon de vata ke rewşa aye xirab a, seba her netîce amade bê û wina va: "Roşnvîr, zanistê nê welatî nika zindanan de grev de yê. Ganî hukmat waştişan bilezgînî bivîno. Vîyane keyeyêke demokrat de amî dinya. Vîyane bi sekn û qerarê xo keye de rolêke rayber kay kerdêne. Pêwa nêweşîya xo kewte grev. Ma seba welatêke ke eşkenê ci de biciwîyê mucadele kenê."

 

'Kezeba xo ra nêweş a'

 

Mehmetî dewamê qalîkerdişê xo de da zanayîş ke  Vîyane nêweşa tuberkulozî ya û kezeba xo ra nêweş a û wina va: "Dimayê grevî nêweşîya aye giran bî. Heta hetê çepî yê bedenê aye bê tesîr mendo û nêeşkana boye xo bigîra. Pêwa nêweşîya xo grev de ya, no ma zî sereberz keno. Vîyane xatir ma ra waşt. Tersê ma pîl o. Ganî her kes bikewo tevger. Ez veng dana dayîkan. Domanî mirenê, wa veng bidê vengê înan."