KOCAELÎ - Hepsîyê cinî yê ke Zîndanê Gebze de grevê vêşanîye de yê, dayîkanê ke vernîya zîndanî de xo ver ro danê rê mektubêk erşawitî û Roja Dayîkan ya înan pîroz kerdî

 

Grevê vêşanîye yê vera tecrîdkerdişê Rayberê PKKyî  Abdullah Ocalanî dewam kenê. Girewteyê ke Hepisxaneyê Gebze de grevê vêşanîye de yê, bi wesîleya Roja Dayîkan mektubêk dayîkanê xoverdayoxan rê nuşte.

 

Hepsîyan dayîkan rê va: “Şima seba ma rûmetê tewr hêja yê. Rûmet û rindekîya merdimîye zerrîya şima de gird bena û bena malê cimatî. Dayîke bingeyê estbîyayîşî ya, dayîke rûmet a, dayîke welat a. No rî ra hêrişê vera merdimîye tewr zêde vera dayîkan yenê kerdene. Serdestîya AKP-MHPyî ya faşîste, bi tecrîdkerdişê Rayberê ma, hêriş bi rûmet û îradeyê şarê Kurdî kena.”

 

Dayîkê hêjayî, ma zanê ke sereyê ma bidejo zî, zerrîya şima parçe parçe bena. Ma seba mergî ney, seba cuyêka bi rûmete û hêjaye xo ver ro danê, têkoşîn kenê. Ma teqîpkarê Mazlûm, Kemal û Sarayan ê. Senî ke înan bi bedenê xo faşîzmê 12ê Êlule bin kerd, ma do zî rêça înan de faşîzmê AKP-MHPyî bin bikerê. Ma do ser bikewê! Seba naye zî ma teyna nîyê, ma bi mîlyonan reyde yê. Şima zî ma reyde yê. Şima teyna dayîkê ma nîyê, eynî wext de hemrayê ma yê têkoşînê azadîye yê, pawitoxê heq û rûmetan ê.

 

Têkoşînê ma yê 40 serrî de şima timî ma reyde bîyî. Ma hêz û moral şima ra gênê. Mengêk o ke vera hêrişanê giranan ê faşîzmî de bi qerardarîye şima vernîya beran de, ma zî peyê beran de xo ver ro danê. Hêrişê hovanê bi şima yenê kerdene, la rixme naye zî şima dest xoverdayîşê xo yê birûmetî ra nêverda. Bi xoverdayîşê xo vengê ma resna temamê dinya. Ma qerardar ê, ma do ser bikewê. Bi qerardarîya serkewtişî û coşê xoverdayîşî, bi nameyê girewteyanê zîndanan ma Roja Dayîkan a şima pîroz kenê. Destanê şima yê kedkaran maçî kenê.”