AMED - Çalakîya grevê vêşanîye yê bêdem û anêgêrayîşî yê Hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî dest pêkerdiş roja 183ine de dewam kena.  

 

Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 183ine de dewam kena. Leylaye ke 25ê Çele de serbest ameye veradayene keyeyê xo de çalakîya xo dewam kena. Serdayîşê seba Leylaye dewam kenê û ablûqayê polîsan verê keyeyê aye zî hîna dewam keno.

 

Dimayê Leylaye bi eynî waştişî Mintiqaya Federalê Kurdistanî çalakîya Temsîlkarê HDPyî Nasir Yagizî roja 171an de, Strasbourgî de 14 kes û Gallerî de zî Îmam Şîşî roja 144 de dewam keno. Endama Meclîsê Îştarî Fadîle Toke roja 109ine de ya. Rojnameger Kîbriye Everena ke Zindanê Tîpê E yê Amedî de destpêkerdene roja 145in de, Hemsereka DBPyî ya verê Sebahat Tuncel û ya parlamentera HDPyî ya verê Selma Irmake ke zindan de dayê destpêkerdiş roja 114in de yê. Heto bîn ra çalakîya hepsîyê ke grevê vêşanîye ê koma yewine roja 144ine de û çalakîya hepsîyan 1ê Adare ra dima heme zindanan de vila bî.  

 

5 ci ra cinî 15 hepsîyan dest bi rojeyê mergî kerdî

 

15 hepsîyê ke 3 mewsîmî yo çalakîya grevê vêşanîye dewam kenê, dimayê 30ê Nîsane sewîyeya çalakîya xo berz kerdî û dest bi "rojeyê mergî' kerdî. Çalakîya hepsîyan dest bi rojeyê mergî kerdî roja 9in de dewam keno.

 

Çalakîya grevî ya parlamenteran

 

Çalakîya Parlementerê Partîya Demokratîke ya Şaran (HDP) Dersîm Dage 3ê Adare de, Tayîp Temel û Murat Sarîsaç ê ke 8ê Adare de dayî destpêkerdiş dewam kenê. Serdayîşê parlamenterê çalakgeran hetê welatîyan ra zî dewam keno.

 

Kesê ke ameyî tahlîyekerdene keye de çalakîya xo dewam kenê  

 

Sedat Akin, Gurbet Ektîren, Mahsun Şen, Mûrat Aksin, Semra Alkan û Îhsan Sinmiş çalakgerê ke zindan de dest bi grev kerdibî û serbest ameyî veradayîş, dimayê ke serbest ameyî veradayîş çalakîyê xo keyeyê xo dewam kenê. Îsmet Yilmaz, Salîh Tekin, Sevican Yaşar, Bîlal Ozgezer awanîya HDPyî yê Amedî de 3ê Adare dest bi grev kerdî û ameyî tepiştiş dima ra serbest ameyî veradayîş û nika keye de çalakîya xo dewam kenê.

 

Mahsum Şeno ke 3 serran Zindanê Tîpê E yê Mêrdînî de mend ke grevê vêşanîye de bi, dimayê 17ê Nîsane de ame tehlîyekerdiş qerar de ke çalakîya xo grev keyeyê xo de dewam keno. Îsmet Yildizo ke seba 3yê Adare de awanîya HDPyî ya Amedî de dest bi grev kerd ame tepiştiş, dima ra serbest ame verdayîş û reyna çalakîya xo dewam kerd, la seba ke reyna çalakîya xo dewam kerd na rey zî ame tepiştiş û dima ra zî ame tepiştiş û nika çalakîya xo nika zindan de dewam keno.

 

Kesê ke çalakî kerdî

 

Bajarê Almanya yê Krefeldî de 20ê Sibate de Ugur Şakar zî vera tecrîdî verê dadgehe de bedenê xo dabi verê adir û nêweşxane de ameyne dermankerdiş, 22yê Adare de cuya xo vindî kerdib. Zindanê Tîpê T yê Xarpetî Mahsûn Pamay, Zindanê Osmanîye Tîpê T de Siraç Yuksek, Zindanê Tîpê T F Şakranî de Yonca Akici, Zindanê Tîpê T yê Cinîyan ê Oltuyê Erziromî de Zehra Saglame, Zindanê Tekîrdagî yê Tîpa F yê Hûmara 2 de Zulkuf Gezen, Zindanê Cinîyan ê Gebzeyî de Ayten Becet û Zindanê Tîpê E yê Mêrdînî de Medya Çinare vera tecrîdê Rayberê PKKyî Abdullah Ocalanî de çalakî kerdî û peynî cuya xo ardî.