AMED - Hanim Îlkare ke di lajê aye 1ê Adare de grev de yê, dîyar kerde ke wexto ke şîya pêvanayîşê domanan ê xo vînaya sereberz bîya la dimayê ke zindan ra vejîyaya bi hîs bîya û wina va: "Ma peyser game nêerzenê. Serkewtiş do ê domananê ma bibo. Ma her wext va ma do reyna vajê; xoverdayîş ciwîyayîş o."

 

Çalakîya grevê vêşanîye ya hemsereka KCD û parlamentera HDPyî ya Colemêrgî Leyla Guvene ke bi amancê tecrîdê serê Rayberê PKKyî Abdullah Ocalanî bêro wedartiş, da destpêkerdene roja 178in de dewam kena û 1ê Adare 7 hezar hepsî çalakîya grevî dewam kenê. domînin. Heto bîn ra 15 hepsî zî 30ê Nîsane de çalakîya xo vurnayê rojeyê mergî.

Birayê yewbînan Seyfettîn Îlkar û Azad Îlkare zî 1ê Adare de grev de yê. Seyfettîn Îlkarî zindanê Bandirmayî, Azadî zî zindanê Tîpa D yê Amedî roja 65an de grevê xo dewam kenê.

 

‘Tu sucê înan çinbi, nê çira yenê kerdene?'

 

Dayîka înan Hanim Îlkare tepişnayişê domananê xo wina va: "Şewêke Azad ameyne keye, TOMA  ey dano vindarnayene û tepişnenê. Dima ra derheqê ey de muebet ame waştene. Tu sucî ey çinbi. Ma nêzanê çira wina kerdî. Ma musayî ke serê ey de îfadeyê estê. Ma nê kesan nas nêkenê. Îfadeyê zî heme zûr ê. Ma waştişname da. Cezaya muebetî xira bî la ma nêzanê do çiqas ceza bigiro. Seyfettîn zî şibi cenazaya Mustafa Malçokî.  Dimayê hedîse ame tepiştiş û 4 serrî û nîm zindanê Amedî de mend. Dima ra surgunê Edîrneyî kerdî û uca de zî 2 serrê mend. Dimayê Selahattîn Demîrtaşî berdî zindanê lajê mi eştî mîyanê edlîyan. Embazê ey hewl dayî ke reyna bêro koxuş la Seyfettîn surgunê Bandirmayî kerdî. 9 serrî yo zindan de yo semedê ke înfazê ey veşnayî nika do 5 serrî bîn zî bimîno. Nika her diyan zî bedenê xo dayê ver mergî."

 

‘Ma wexto ke înan vînenê sereberz ê'

 

Hanime arde ziwan ke pêvînayîş de musayê ke domanê aye kewtê grev û va heta peynî pey waştişê înan ê û wina va: "Hepsî vatî heta nika waştişê înan nêrê bi ca dest grev ra vera nêdê. Ma zî serkewtiş înan rê waşt. Hepsî bi waştişê heqdar kewtî grev. Ma wexto ke înan vînenê sere berz benê la dimayê ke ma vejîyenê teber ma xemgîn benê.”

 

‘Rewşa înan baş nîya’

 

Hanime da zanayîş ke rewşa domananê înan qet baş nîyo û va lazimîyê xo yê lazim î zî nêeşkenê bi ca bîyarê û wina va: "Awa fêkiyan, lîmon û çîyê bîn yê awe nêdanê. Bi kêfî nêdanê. Koma ewil ra rewşa Serdar û Ekrem baş nîya. Vîtamînê ke bi pereyê xo gênê zî nêdanê. Azad wexto ke ame vernîya mi bi kursîyan girewt û ame. Ninûkê ey sîya bîbî. Nêeşkayne qisey bikero."

 

Hanime veng da Emîne Erdogane wina va: "Wa Emîne Erdogane xo bikero vera ma. Domanê aye zî estê. Wa domanê aye hewteyêke werd nêwerê do se bikero. Ma şinê verê zindanan hêrişê ma kenê. Ma şî verê Tîpê D ma va çalakîye kenê. Ma hîna wesayîtê nêameybî warî bi seyan polîsî dorê ma girewt. Vatêne qey hela ma se kenê. Roj, rojê roniştişî nîyo. Wa her kes xo bikero vera ma. La ma peyser game nêerzenê. Netîce se beno wa bibo do domanê ma serkewte bibê. Ma reyna vanê; Xoverdayîş ciwîyayîş o."