ŞIRNEX - Roniştişê polîsanê ke bi panzere di domanî kiştî ame viraştene. Ame zanayene ke polîso verguman Omer Yegît reyna dest bi wezîfeyê xo kerdo.

 

Roniştişê 8’ine yê polîso ke şoforê wesayîta zirxine bi û amîrê ey Murat Madeno ke o wezîfedar kerdo ame viraştene. Polîs Omer Yegît û amîrê ey Murat Maden 3'ê Gulane 2017 de qezaya Silopî ya Şirnexî de bi panzere kewtibî keyeyêk û di domanê ke birayê yewbînî yê bi nameyê Muhammed (7) û Furkan Yildirim (6) kiştibî. Roniştişê di polîsan, ke bi sûcê “bî sebeb ke kesêk ra zêdetir merdim bimirê” 2 seran ra heta 15 serran ceza ci rê yena waştene, Mehkemeya Cezaya Giran a 2‘ine ya Cizîrî ameye viraştene.

 

Raporo ke verê roniştişî derheqê 2 polîsan de ameyo amadekerdene kerd mîyanê dosya.  Roniştiş de polîsê verguman, avûkatî û pîyê domanan Mesût Yildirim amade bî.

 

Polîsê vergumanî vat serebutî de tu kêmasîya ey çin a, amîrê ey Murat Madenî zî vat înan rê ferman meqamanê corî ra ameyo û înan zî ardo ca.

 

Mademî vat, ferman  Mudirê Asayîşî yê Qeza yê ê wextî Selçûk Erdoganî dayo û bale ante serê na rewşe ke rapor da ca nêameyo cidayene.

 

Serekê Baroyê Şirnexî Nûşîrevan Elçîyî bale ante serê raporê peyênî û vat, “Gelo wesayît do bêro cezakerdene?” Elçîyî waşt ke Unîversîteya Teknîkî ya Rojakewtene yan zî Dezgehê Tipî yê Edlî raporî reyna amade bikerê.

 

Avûkat Rojhat Dîlsîzî vat, raporê teftîşî de Mudirê Asayîşî yê Qeza Selçûk Erdogan biqusur ameyo nîşandayene û vat, “La cipersayîş de na nêameya dayene. Verguman û muştekîlî, vanê ma bi fermanê Erdoganî wezîfeyê xo ardo ca.”

 

Dest bi xebatî kerdo

 

Polîso verguman Omer Yîgîtî vat, ey reyna dest bi wezîfeyî kerdo, waşt ke serbestbîyayîşê bikontrolî bêro wedaritene. Mehkeme qerar da, mucbur îmzaeştişê verguman Yîgîtî wedarna û raporo newe qebûl nêkerd.  Roniştiş taloqê 31’ê Gulane bi.