KOCAELÎ - Keyeyê girewteyanê sîyasîyan ê ke vera tecrîdî grevê vêşanîye de yê, wexto ke vernîya Hepisxaneyê Gebzeyî de nobete girewtêne reya bîne polîsan hêriş kerd. Hemserekê HDP'yî yê Gebzeyî bi derbkerdiş ame destbendkerdene.

 

Keyeyê ke cehd kenê vengê girewteyan ê ke grevê vêşanîye de yê bidê heşnayene, roja 23'ine de vernîya Hepisxaneyê Gebzeyî de çalakîya roniştişî viraşte.Keyeyê ke her roje bi hawayêkê sîstematîkî vernîya înan yena girewtene û benê hedefê hêrişan, verê tewrbîyayîşê 1'ê Gulane Roşanê Karkeran, saetanê şodirî de Gebze de ameyî têhet. Polîsan dorê keyeyan girewt û ard ziwan ke çalakîye qedexe ya û ê do destûr nêdê. Keyeyan reaksîyon da polîsan û ard ziwan ke ê do wareyî ra dûrî nêkewenê û dest bi çalakîya roniştişî kerd. Polîsan reya bîne hêriş bi keyeyan kerd, erdî ra kaş kerdî û ê cayê înan ra werişnayî.

 

Hemserekê HDPyî ameyî derbkerdene

 

Hemserekê HDP'yî yê qezaya Gebze Îdrîs Ay bi derbkerdiş ame destbendkerdene. Ay wextêk ra tepîya ame verdayene. Keyeyan da zanayene, ê do roja Panşeme çalakîya xo dewam bikerê û seba ke tewrbîyayîşê mîtîngî 1'ê Gulane yê Bakirkoyî bibê vernîya hepisxaneyî ra şîyî. Hetê bînî ra, polîsan fotograf û dîmenê ke rojnamegeran wextê çalakîye de ante bi zor ci ra girewtî. Dîmenê ke telefonanê dayîkan de yê zî bi zor ci ra ameyî girewtene.