Berçem Cûdî

 

KOBANÊ - Endama Îdarekara Rêxistinê Sara ya vera Şîdetê serê cinîyan Şêrîn Mislime bi munasebetê roja karkeran ya Dinya va: "Kedkara tewr pîl cinî ya, şorişê Rojawanê Kurdistanî de tewr zêde ked û  bedel dayî mayî bî û yê ke sîstemê demokrasî aver berdî û pawitî zî cinî bî."

 

Serra 1856an de kedkarê Avusturalya, dima ra kedkarê Amerîkayî, Kalîfornîya seba kêmkerdişê saetê xebate vejîyayî rasteyan û vera sîstemê dewlete vejîyayî. Têkoşînê Kedkaran netîce girewt û serra 1872an de seba kedkaran qanûnê pawitişê heqê înan vejîyayî. Dimayê ci têkoşînê kedkarê Amerîkayî dinya de veng dayî, coka zî kedkarê pêro dinya waştişê heqê xo kerdî, nê dir zî serra 1891an de 1ê Gulane sey roja Kedkarê dinya ame neqlkerdene û a roje sey fermî betalî ya û her serre temamê dinya de kedkarî kewenê rasteyan.

 

'Mayan bi keda xo adirê şorişî wey kerdî'

 

Endama Îdarekara Rêxistinê Sara ya vera Şîdetê serê cinîyan Şêrîn Mislime, destpêk de 1ê Gulane Rayberê PKKyî Abdullah Ocalan û heme karker û kedkran rê pîroz kerde û wina va: "Hizur û serkewtişê ke ma ewro cuyenê, heme xêrê şehîdan ê ma yo, şehîdê ma domanê maya xo yê, coka zî keda tewr pîl ê mayan a. Cinîyan çîyê tewr bi erj kezebe xo feda kerdî, seba azadî û hizurê welatê xo. Mayê ma bi tilîlî û kêfweşî domanê xo sipernenê herra welat. Seba nê zî wexto ke ma qalê kede bikerê, erj o ke ma kedkara tewr pîl cinî bîyarê xo vîr. Mayan bi keda xo adirê şorişî wey bikerê."

 

'Cinî bingeyê pawitiş û awankerdişê sîstemê demokrasî yê'

 

Şêrîne da zanayîş ke cinî bingeyê pawitişê Şorişî yê û wina va: "Seba destpêkerdiş û bi serkewtişê şorişî ke amebi rêxistinkerdene, kedêke pîl lazim bî. Heto bîn ra seba awankerdişê sîstemê Îdarekerdişê Xoserîyê Demokratîk zî bedel û kedêke bierj ame dayene. Yê ke nê şorişî pîl kerdî no sîstem û cinî bî. Coka ma zî silam û hurmetê xo seba kedkarê tewr pîl eşrawenê û na roje înan rê pîroz kenê."