Hepsîyê sîyasî dest bi "Rojeyê mergî" kenê

  • 14:05 29 Nîsane 2019
  • NAROJANE
MERKEZÊ XEBERAN - Zîndananê Kurdistan û Tirkîye de bi hezaran hepsîyê doza PKK û PAJKî seba wedarnayîşê tecrîdê serê Rayberê PKKyî Abdullah Ocalanî grevê vêşanîye yê bêdem û anêgêrayîşî de yî. Hepsîyan bi eşkerayîyêk dayî zanayene ke merheleya xoverdayîşê grevê vêşanîye gamêk bîn do berz bikerî û siba 15 hepsî do dest bi rojeyê mergî bikerî. Nameyê hepsîyê ke dest bi rojeyê mergî bikerî ameyî eşkerakedene
 
Xoverdayîşê grevê vêşanîye ke seba wedarnayîşê tecrîdê serê Rayberê PKKyî Abdullah Ocalanî dîyayî dest pêkerdene dewam kenî. Zîndananê Kurdistan û Tirkîye de bi hezaran hepsîyê doza PKK û PAJKî grevê vêşanîye yê bêdem û anêgêrayîşî de yî. Hepsîyan eşkerayîyêka newe weşênayî û dayî zanayene ke merheleya xoverdayîşê grevê vêşanîye gamêk bîn do berz bikerî û siba 15 hepsî do dest bi rojeyê mergî bikerî.
 
Hepsîyê doza PKK û PAJKî destpêkê eşkerayîya xo de sîstemê modernîteya kapîtalîst rexne kerdî û wina vatî: “Pawitoxê modernîteya kapîtalîst her tewir sîstem, apeymendişî xo rê mubah vînenî û dizîya înan ya tewr girdî oyo ke şexsan komelî ra dûrî kenî. Wazenê ke komelêko yew reng, yew ziwan û yew kulturî awan bikerî û tena açarîyayîşê çerxa xo wazenî. Derdê pawitoxê sîstemê modernîteya kapîtalîst azadî û demokrasî nîyo, vetişê kaosê komelkî yo. Bi polîtîkayê ke aver benî de tena peynî xo anî. Tewr zêde zî komelê kurd parçe kenî, her tewir zilm kurdan rê meşrû vînenî, çimkî baş zanê ke şarê kurd girêdayeyê heqîqetê azadî yo, erjê xo yo û tu reyan fek xoverdayîşî ra vera nêdano. Bi xapênayîşî pêroyê komel, parçe kenî, la ganî baş bizanî ke erjê komelê şarê kurdî zaf xurt î û nêrijîyenî.”
 
‘Xoverdayîşê bierj serkewte bibo'
 
Hepsîyê sîyasî dîyar kerdî ke AKP û MHPyî tehemûlê kurdan û erjê kurdan nêkenî û wina domnayî: “Pawitoxê sîstemê modernîteya kapîtalîst bi destê xo zîndanê Îmrali awan kerd. No karakterê înan nîşan dano. Zîndanê îşkenceyê yê Îmrali de Rayberê ma binê tecrîdêko gorankerde de yo. ewro eynî zîhnîyet û vindetiş dewam keno. Faşîzmê AKP û MHPyî tehemûlê kurdan û erjê kurdan nêkenî û zaf eşkera polîtîkayê îmha û înkarî meşnenî. Seba wedarnayîşê tecrîdê serê Rayberê ma, çar parçeyê Kurdistan û Ewropa de xoverdayîş aver şonî û beden mirenî. Nêeşnawitişê na rewşe yena mehneya dûrîkewtişê merdimîye. Seba wedarnayîşê tecrîdê serê Rayberî û şarê xo, no 134 rojî yo kem a grevê vêşanîye de yî û qerardarîya ma hewnê faşîzmî herimnena."
 
'Ganî tecrîd bêro wedartiş'
 
Hepsîyê sîyasî dewam de wina vatî: "Selahîyetdarê dewlete û TBMM seba demokratîkbîyayîşê Tirkîya û halkerdişê problemê kurdan eke samîmî yo ganî tecrîdê serê Rayberîya ma wedaro û ê rê şertê azadî û xebata azade bêrê viraştene. La rixmo ke zîndanan de bi hezaran kesî grevê vêşanîye de yê, hewna serekê TBMMyî parlamentera HDPyî ya Colemêrgî Leyla Guvene dir nêkewto temas û îradeyê şarî goşdarî nêkerdo."
 
‘Ma 30ê Nîsane de dest bi rojeyê mergî kenê’
 
Hepsîyan da zanayîş ke 30 Nîsane ra dima dest bi rojeyê mergî kenê û wina vatî: "Mîyanê nê rastîyan de ma hemverê hende bêhîsdarî û bêvengîye de qerar da ke grevê xo yê vêşanîye biresnê merheleyêka newî û 30’ê Nîsane ra tepîya ê açarnê Rojeyê Mergî. Ma sey tepişteyê PKK û PAJK’ijî bi peyrewîya xoverdayîşê rojeyê mergî yê 14ê Temmuze wazenê ke tewirêkê lîyaqî ramojnê û ma do rojeyê mergî bi koordîne û bi heşmendî organize bikerê. Nê bingeyî de tebere nameyanê cêrînan de do grevê ma yê vêşanîy yê bêdem-bêagêrayîşî zî dewam bikerê. Seba gamanê bicaardişê waştişanê ma muxatab embazê ma yê ke zîndanan de grevê vêşanîye de yê û embaza ma Leyla Guven a ke serkêşîya nê xoverdayîşî kerdebî. Netîce de ma wazenê bêro zanayene ke qetîyen ma do xo tewiranê şexsî yê fevrîyan ra dûrî bidê û bi terzêkê organîzekerdeyî tê bigêrê.”
 
Hepsîyê sîyasî tewr peynî veng dayî heme hepsîyan ke esasanê rêxistinbîyaye ser de têbigêrî û bi hawayo şexsî tênêgêrî.
 
Nameyê 15 hepsîyê ke siba do dest bi rojeyê mergî biker;
 
Zîndanê Bakirkoyî yê Cinîyan ê Girewteyî de; Nesrîn Akgul, Şukran Aydin, Zozan Çîçek
 
Zîndanê Gebze yê Cinîyan ê Girewteyî de; Ardil Çeşme, Asli Dogan
 
Zîndanê Wanî yê bi Asayîşê Berzî de; Ahmet Anigi, Ozhan Ceyhan, Vedat Ozagar, Îhsan Bulut, Erol Çelîk
 
Zîndanê Tîpa Dyî yê Amedî de; Engîn Akhan, Enver Durmaz, Ahmet Topkaya, A. Haluk Kaplan û Ferhat Turgay.
 
'Ma do qetî serkewte bibê'
 
Hepsîyê dewaya PKK û PAJKî bi nê vatişan eşkerîyeyê xo peynî kerdî û wina vatî: "Ma bi heme zerrîya xo bawer kenê ke kîlîdê cuya demokratîk û azade Rayber Apo yo. Naye ra ma veng danê şarê xo ke Rayberîya xo rê wayîr vejîyê. Ma veng danê heme roşinvîr, nûştox, demokrat û akademîsyenan ke hemverê faşîzmî de xover bidê. Ma do serkewtişê xoverdayîşê xo tacîdar bikerê û qetîyen bi ser bikewê.”