MERKEZÊ XEBERAN - Polîsanê Îngilîzî hêrişê şarî yo ke seba protestoyê tecrîdê serê Ocalanî banê Rêxistinê Efû yê Mîyanneteweyîyî yê Londra de çalakîya bêîtîatîya sivîle viraştêne kerd. Polîsî 20 çalakwanî destbend kerdî. 

 

Polîsanê Îngilîzî mudaxeleyê çalakîya ke seba protestokerdişê tecrîdê serê Rayberê PKKyî Abdullah Ocalanî vizêr ra banê Rêxistinê Efû yê Mîyanneteweyîyî yê Londra de ameyêne viraştene kerd. Polîsê Îngilîzî yo ke vîst çalakwanê ke banî de bî destbend kerdî, bi hêriş çalakwanan ê Kurdan kerd. 

 

Çalakîya protestoyî ya ke hetê Meclîsê Cinî yê Rojî, Yewîya Cinîyan a Sosyalîste, Komeleya Kulturî ya Karkeran ê Koçberan (Gîk-Der) û Meclîsê Şarê Kurdî ra bi hawayêkê hemparî ameyêne viraştene, roja Çarşemeyî bi dekewtişê banê Rêxistinê Efû yê Mîyanneteweyîyî dest pêkerdebî. Pêvînayîşanê ke îdarekaranê Rêxistinê Efû dir ameybî kerdene înan ra netîceyêk nêamebi girewtene û sere ra hemverê çalakwanan de muameleyê ke teberê merdimîye de bî estbî. 

 

'Çalakgerî ameyî kelepçekerdene'

 

Îdareyê Rêxistinê Efû yê Mîyanneteweyîyî bişewe saet 01:00 de veng da polîsan û waşt ke çalakwanî banî terk bikerê. Polîsê ke ameyî cayê çalakîye çalakwanan ra waşt ke banî veng kerê, dimayo ke çalakwanan no qebûl nêkerd rastê hêrişê polîsî ameyî. Çalakwanê ke rastê hêrişî ameyî destê înan pey ra ameyî kelemçekerdene û bi nê hawayî ameyî destbendkerdene. 

 

Mîyanê çalakwanan de Nahîde Zengîne û Mehmet Saît Yilmaz zî estbî ke 44 rojî yo grevê vêşanîye yê bêdem û bêagêrayîşî de bî, ê zî rastê hêrişê polîsan ameyî. Nahîde Zengîn a ke halê aye yê weşîye bibi xirab û amîbî berdene nêweşxane, dimayo ke tedawî qebûl nêkerdebî reyna amîbî ardene merkezê Rêxistinê Efû. Êyê ke ameyî destbendkerdene sere de Barnet ameyî berdene îstasyonanê polîsan ê Londra yê cîyayan.

 

'Hêrişêke îhlalkerdişê heqan bi'

 

Meclîsê Şarê Kurdî yê Brîtanya tewirê hemverê çalakîya protestoyî yê Rêxistinê Efû yê Mîyanneteweyîyî şermezar kerd û nê vatî: “Rêxistinê Efû yo Mîyanneteweyî hemverê çalakwananê ke tecrîdî protesto kerdo hîrê rojî tecrîd bica ardo. Berî çalakwanan ser o girewtê, nêverdayo ke ê tuwaletan bişuxulnê û bi nê hawayî adeta çalakwanan rê îşkence kerdo. Ma înan ra waştibi ke derheqê tecrîdê serê Rayberê PKKyî Abdullah Ocalanî de û halê tepişteyan ê zîndanan de eşkerayîyêk bidê. Rêxistinê Efû goş nêda nê waştişê ma. Sere de çalakwanî tecrîd kerdî dima ra zî ver bi serê sibayî polîsî dekerdî bîna û musade kerd ke hêrişê çalakwanan bikerê. Ma sey Meclîsê Şarê Kurdî yê Brîtanya nê nizdbîyayîşê teberê exlaqî û merdimîye yê Rêxistinê Efû yê Mîyanneteweyîyî şermezar kenê. No nizdbîyayîş seba Rêxistinê Efû lekeyêko sîya yo û ramoto ke ê hetê mezlûman de nê, hetê  zaliman de yê."