ÎZMÎR - Kedkara perwerdeyî Ebru Dînçere da zanayîş ke KHKyijî bi amancê muxalîfan bîyarê rewşa ‘merdeyê komelî' sey hacetê tecrîdî ameyê xebitnayîş û va lîsteyê weçînayîşî de ca girewtişê KHKyijan seba AKPyî cewabêke bi. Ebruye va heta kuçeyî nêrê xurtkerdiş, heta sey têkoşînê heqê merdiman, demokrasî, ked û aştîye nîno vînayene, ma nêeşkenê vajê netîceyê weçînayîşî seba birînan bîyo derman.

 

Namzedê verê ke bi KHK ameybî îxrackerdiş û weçînayîşê herêmî de bîbî namzed û ameybî weçînayîş, bi sebebê karê xo ra ameyê îxrackerdiş mazbatayê înan nêdayê. Endama Egîtîm Senî Ebru Dînçere zî ke KHK amîbî îxrackerdiş, derheqê babete de qisey kerde.

 

Ebruye dîyar kerde ke dewlete bi amancê muxalîfan bîyara rewşa ‘merdeyê komelî' KHKyijan sey hacetê tecrîdî xebitnena û weçînayîşan de seba şiknayîşê polîtîkayê tecrîdî gzaf girîng bi û hemleyêke baş bi. Ebruye da zanayîş ke pêwa muracatê înan ameyê qebulkerdene, mazbata nêameyê dayene û ganî kuçeyî ageyrê cayê têkoşîn.

 

'Heqê weçînayîşî ame xespkerdene'

 

Ebruye dewam de da zanayîş ke îhlalkerdişê ke KHKyijî ciwîyayî ameybî xovîrrakerdiş û lîsteyê HDP û CHPyî de vînayîşê înan hemleyêke polîtîk ê rast bi û va: "AKP bajarê Kurdan bi qayûman îradeyê şarî xesp kerd. HDPyî dayeyêke cidî yê rayan newe ra şaredarî girewtî. AKPyî fek kayan ra vera nêda û bi KHKyijan dest bi karê xo kerd. No îhlalkerdişê heqî yo. Xespkerdişê heqê weçînayîşî yo. Ganî ma vera hêrişê îqtîdarî amade bê. Heta kuçeyî nêrê xurtkerdiş, heta sey têkoşînê heqê merdiman, demokrasî, ked û aştîye nêrê vînayene, ma nêeşkenê vajê nê netîceyê weçînayîşî seba birînan bîyê derman."