MERKEZÊ XEBERAN - Aktîvîstê Almanî seba ke bale biancê serê 7 hezar tepişteyanê ke vera tecrîdê serê Ocalanî grevê vêşanîye de yê, dest bi kampanyaya afîşe ya girde kerd. Organîzetoranê kampanya veng da hetanê eleqedaran ke wa ewro aliqnayîşî afîşî xo vîra mekerê

 

Grevê vêşanîye yê ke rayberîya Leyla Guvene de dest pêkerd û zîndananê herême û Tirkîya û xeylî cayanê dinya de vila bîyî, înan rê paştdayîşî zêdîyene. Aktîvîstê Almanî no hewte dest bi kampanyaya aliqnayîşê aşîfan kerde.

 

'Êdî qêrînayîşan bieşnawê'

 

Organîzatoranê Kampanya ra Ella Bremere derheqê kampanya de qisey kerd. Ella da zanayene ke bi taybetî bajaranê sey Berlîn, Hamburg, Leipzîg, Koln, Frankfurt û Munihî de pankartî do berê aliqnayene û va:‘‘ Eke şima wazenê vengê xoverdayoxan bidê eşnawitene ewro afîşê xo cayêk de dard bikerê. Ça beno wa bo, tena wa bero vînayene her ca de aşîfê xo bialiqnê. Bi na kampanya ma wazenê ke vengê xoverdayoxan hukmatê Almanya û CPT rê bidê eşnawitene.‘‘

 

Ella waşt ke mekteb, keye, cayê karî, wesayît, bisîklet, dar, yega ça beno wa bibo wa her kes yew afîş bialiqno û bale bianco serê grevê vêşanîye û fotografê ci binaco û medyaya sosyale ser a pare bikero.