Berîtan Canozer

 

AMED - Tîyatroyê Bajarê Amedî ke do yewin rey Merkezê Kulturê Amedî de vejîyo sehne, seba mîhrîcanî amade yo. Kaykerdoxa tîyatroyî Elvan Koçere va înan qayûm eşrawito û reyna serê sehne de yê û her kesî dawetê mîhrîcanî kerde.

 

Kaykerdoxa Tîyatroyê Bajarî ke dimayê qayûm tayînê şaredarîya bajarê pîl ê Amedî bi, kar ra ameyî eştiş û cayêke alternatîf Tîyatroyê Bajarê Amedî awan kerdî û bernameyê Mîhrîcanê Tîyatroyê ê Amedî ke emsar 7in yeno kerdene eşkera kerd. Tîyatro bi sloganê ‘heqîqet azad keno' do mabêne 26-25ê Gulane de bêro kerdene. Do 12 kayî bêrê kaykerdene. Kaykerdoxa tîyatroyî Elvan Koçere derheqê bernameyê mîhrîcanî de qisey kerde.

 

'Mîhrîcan do bi beşdarbîyayîşê 11 koman bêro kerdene'

 

Elvane dîyar kerde ke aye mîhrîcan dîyarîyê derhêner-nuştox Mehmet Emîn Yalçinkaya ke serra vîyarte de cuya xo vindî kerd, kenê û va: "11 kayan ra weta do 11 komê ma vejîyê ser sehne. Do atolyeyê ma bibê. Atolye zî do 4 rojan dewam bikero. 26ê aşmî de do abibo, yewin rey ma do merkezê kongreyî de vejîyê sehne. Ma nêvanê merkezê kongreyî, ma vanê Merkezê Kulturê yê Amedî. Seba ke qayûm sey Merkezê Kongreyî xebitnayo."

 

'Ma do sehneyê xo de bê'

 

Elvane da zanayîş ke dimayê ke qayûm tayîn bîyo dima torra piştdayîşêke pîl bi Tîyatroyê Bajarê Amedî ra ameyo akerdene û va do newe ra vejîyê serê sehneyê xo. Elvane wina va: "Dimayê mîhrîcanî zî do xebatê ma dewam bikerê. Ma do gama yewin ê projeyê muzîkalê domanan zî bierzê. Projeyê ma yê Mem û Zîn zî estbi. Ma do dimayê mîhrîcanî newe ra serê nê de vinderê û kay bikerê."