Hamdiye Çîftçî

 

COLEMÊRG - Bi ameyîşê wisarî vilikanê ke rengarenk abîyê erdê Mezopotamya xemelîyayê, vilikan pîya bi xo umîdî zî kerdê zergûn û boya xo vila kerda.

 

Vilikî, seba xeylî nêweşîyan îlac ê, boyê weş ê, seba resam û şaîran çimeyê îlhamî yê, sembolê heskerdiş û xasekîye yê. Heman wextî de fîgurê hîkayeyan ê, temsîlê hîsan, kêfweşîye, verkewtişî û dejî yê. Erdanê Mezopotamya de zî vilikî bi ameyîşê wisarî benê nameyê xasekîya bêhempaye. Vilikê rengarengî yê ke erdanê Mezopotamya de benê gane, reng danê xozaya ke rixmê şertanê çetinan ê zimistanî de xover dana.

 

Vilikê Colemêrgî û herême, mîyanê ko, kerre û sîyan ra vejênê, pêresenê tîjîya rojî. Xozaya ke virara xo de vilikanê bi rengê mor, sûr, zerd û zergûnî akena û boya weşe ci ra yena, bi binewşe, lale û pîvokan şayîyêka dîmenkîye afernena.