WAN - Merdimê hepsîyan ke grevê vêşanîye de yê, dîyar kerdî ke ganî wazeretê dade êdî wezîfeyê xo bi ca bîyaro û vatî: "Ganî tecrîd bêro wedartiş û waştişê hepsîyan bi ca bêrê."

 

Çalakîya grevê vêşanîye ya hemsereka KCD û parlamentera HDPyî ya Colemêrgî Leyla Guvene ke bi amancê  tecrîdê serê Rayberê PKKyî Abdullah Ocalanî bêro wedartiş dest pêkerde, roja 164in de dewam kena. Dimayê Leyla Guvene zindanan de grev vila bi û 7 hezar hepsî beşdarê grev bî. Seba keyeyê ke waştî wezaretê dade dir pêvînayîş bikerê zî hema randevu nêameyo dayene û nêverdayî dayîkî bikewê Enqere zî.

 

'Ma do hema çiqas binê zulmî de bimanê'

 

Cinîya bi nameyê Zubeyde Tîmure ke lajê aye grev de yo wina va: "Heta ke şima eşkenê veng bidê vengê ma. Waştişê ma zî o yo ke ganî tecrîd wirzo û grev peynî bê. Ma do heta key binê zulmî de bimanê."

 

'Yewin waştişê ma cuyake bi edalet o'

 

Cinîya bi nameyê Xeme Aydine zî da zanayîş ke ganî wezaretê dade nê persan rê cewab bido û wina va: "Roj bi roje domanê ma verê çimanê ma de helênê. Ma nêwazenê zindanan ra tabut vejîyê. Nê welatî de yewin waştişê ma cuyake bi edalet o. Heta ke tecrîd serê Abdullah Ocalanî ra nêwirzo do teda û tecrîd serê ma de dewam bikero."

 

'Wa di rojî bikewê grev, wa biewnê bi înan se beno'

 

Medîne Kiyake da zanayîş ke zindanê Tîpê L yê Panosî de îhlalkerdişê heqan dewam kenê û wina va: "Lazimîyê hepsîyan bi ca nînê. Ganî wezaretê dade û selahîyetdarî game bierzê. Wa di rojan werd nêwerê do se bikerê?"

 

Ayşe Aliciye zî arde ziwan ke ganî bêvengîye Ewropa xira bibo û wina va: "Gelo Ewropa rewşa tîya nêvînena? Heta waştişê hepsîyanê ma bi ca nêrê ma fek têkoşînê xo ra vera nêdanê."

 

'No xoverdayîş seba ma pêrune yo'

 

Emîne Dag Agaçe zî vatişê lajê xo ke grev de yo wina va: "Çira bermena, no xoverdayîş seba ma pêrune yo. Heta tecrîdî serê şarê Kurdî peynî nêbo, no xoverdayîş do dewam bikero. Her ke ma zere de xo ver danê, şima teber de xurt bibê û vengê ma bidê eşnawitiş."

 

Emîneye tewr peyîn da zanayîş ke kezeba înan veşena û wina va: "Wexto ke ma sifre danê ro, ma nêeşkenê werd biwerê. Her çiqas kezeba ma biveşo zî gerek ma piştdayîş bidê xoverdayîşê înan. Ez veng dana pêro şarê Kurd û dayîkan, seba şiknayîşê tecrîdî gerek ma kuçeyan de bê."

 

'Wa wezaret wezîfeyê xo bi ca bîyaro'

 

Besra Sarihane zî da zanayîş ke ganî cewab seba waştişê hepsîyan bêro dayene. Hayrîye Turgut û Sabiha Hazare zî veng da wezaretî ke wezîfeyê xo bi ca bîyaro.