DÊRSIM - Dêrsim de keyeyê ke domanê înan grevê vêşanîye de yê bi eşkerayîyêk bale antî rewşa krîtîke ya domananê xo ser û vatî: “Tecrîd şer, zulm û hesra dayîkan o.”

 

Dêrsim de keyeyê ke domanê înan grevê vêşanîye de yê Şubeya Komela Heqanê Merdiman (ÎHD) ya Dêrsimî de eşkerayîyêk dayî û bale antî serê rewşa xoverdayoxan. Hemserekê Komeleya Heqê Merdiman (ÎHD) yê Dêrsimî Gubuz Solmazî  vist vîrî ke rewşa xoverdayoxanê grevê vêşanîye merheleya krîtîke de ya û waşt ke tecîd cade bêro wedartene.

 

Merdimanê xoverdayoxan ra Şerîfe Kiliça  ke lajê aye Bariş Kiliç 124 rojî yo ke Zîndanê Xarpêtî de grevê vêşanîye de yo, veng daye Serokkomarê Tirkîye Erdoganî û Wezîrîya Edelatî ke tecrîd wedarê û dîyar kerde ke hinî beso wa haştîye bêro.

 

Dayîka Kazim Kitî yo ke 1ê Adare ra nata grevê vêşanîye de yo, Ferîde Kite zî ard ziwan ke lajê aye xora nêweş o û bi grevê vêşanîye halê ey hîna xidar bîyo û va: “Tecrîd şer, zulm û hesra dayîkan o. Waştişê domanê ma biheq ê. Waştişê înan waştişê ma yê. Tecrîd wa biqêdîyo, game bêrê eştene û wa kes memiro.”

 

Dayîka Nîhat Kasûno ke 1ê Adere ra Zîndanê Xarpêtî de grevê vêşanîye de yo, Bedrîye Kasûne zî veng da îqtîdarî û va: “Eke hema tayî wijdanê şima mendo, tecrîd wedarenê. Wa domanê ma memirê. Waştişê domananê ma, watişê ma yê û ganî bêrê bicaardene. Wa tecrîd cade bêro wedartene.”