MÊRDÎN - Sîbel Akdenîza ke vera tecrîdî Îmralî 5 Çele ra  zindanê Tîpê E yê Mêrdînî de grevê vêşanîye de ya, ame zanayîş ke kewta 40 kîlo û hişê aye reyan şino.

 

Çalakîya grevê vêşanîye ya Hemsereka Kongreya Komelê Demokratîke (KCD) û parlamentera Partîya Demokratîke ya Şaran (HDP) ya Colemêrgî Leyla Guvene ke bi amancê tecrîdê serê Rayberê PKKyî Abdullah Ocalanî bêro wedartiş, dest pêkerde, roja 162in de dewam kena. Dimayê Leylaye bi seyan hepsî eynî amancî kewtî grev û yew înan ra zî Sîbel Akdenîz a. Çalakîya Sîbele kewt roja 104ine. Ame zanayîş ke Sîbele 10 kîlo daya û eynî wextî serê hişê xo ra şina.

 

'Ma bimrê zî fek ci ra vera nêdanê'

 

Goreyê zanayîşê ke keyeyê aye ra ameyî girewtiş, rewşa Sîbele baş nîya û seba ke kîlo daya, xeylê cilê aye ci rê nêbenê û aye vato ke, 'Ê bimrê zî fek ci ra vera nêdanê.' Sîbele roportajê ke dabi ajansê ma derheqê amancê çalakîye de wina vatibî: "Ma kesê ke wazenê bibê hemrayê Kemal Pîro ke vatib 'Ma qasê ke bimrê cuye ra hes kenê.' Ma wazenê bibê hemrayê Mazluman yê ke seba îxanet parçe bikerê bedenê xo kerdî meşale. Ma zî eşkenê sey Semayan bibê pirda xoverdayîşî. Coka ma vanê ke vatişo peyîn kesê ke verê ma vatê, 'Peynî senîn bena wa bibo do zaf weş bo' vatişê lehengê Sûrî Şehîd Çiyagerî yo. Ma do qetî serkewte bibê."

 

Zindanê Mêrdînî de 5ê Çele de hepsîyê grev de yê nameyê înan wina yo: Sîbel Akdenîz, Bayram Demîrhan, Mahsun Şen, Zana Yilmaz, Bîrdal Abay, Şerîf Demîrtaş, Vedat Duyuş, Bariş Akkuş, Oktay Gul.