Berîtan Canozer

 

AMED - Dayîka hepsîye bi nameyê Rozerîn Kurte, Remzîye Kurte pers kerde, ‘Ma do key vengê xo berz bikerê' û va hukmat bêveng o la ê sey keye do bêveng nêmanê.

 

Rozerîn Kurte 2015an de Bedlîs de wexto ke unîverste wendêne amî destbendkerdiş û tepiştiş. 3 serrî yo zindan de ya. Rozerîne nika zindanê Cinîyan ê Sîncanî de tepişnayeya, 1ê Adare de vera tecrîdê Rayberê PKKyî Abdullah Ocalanî grev de ya. Dayîka aye Remzîye Kurte veng da hukmatî.

 

'Wa domanê ma nêmirê'

 

Remzîye da zanayîş ke domanê înan seba waştişêke heqdar kewtê grev û wina va: "Ma sey keye verê domananê xo de yê. Wa kezebe tu dayîkêke nêveşîyo. Rozerîne 47 rojî yo grev de ya. Bi seyan hepsî bi aşman o grev de yê. Kezeba ma verê fekê ma de ya. Wa rayîrê Îmralî abibo. Wa domanê ma nêmirê."

 

Remzîye da zanayîş ke kêna aye 9 serrî ceza girewta û wina va: "Rewşa hepsîyan her ke şina giran bena. Rozerîne nika baş a. Hepsîyêke bi nameyê Besta esta. Bi 3 aşmî yo grev de ya. Leyla Guvene 161 rojî yo grev de ya. Hema veng kesî ra nêameyo vetiş. Hukmat bêveng o ma nê qebul nêkenê. Ma destûr nêdanê nê. Ê çîyêk nêkenê la ma do bikerê."

 

'Domanê ma ameyê ver merdişî'

 

Remzîye tewr peyîn qiseykerdişê xo de veng da heme pawitoxê heqê merdiman û keyeyan û wina va: "Eke ewro nêbo, ma do key vengê xo vejê? Domanê ma, Leyla ameya ver bi mergî. Ma wayîrê domananê xo nêvejîyê do kam vejîyo? Hepsî wazenê ma veng bidê vengê înan."