Hamdiye Çîftçî

 

WAN - Sereka SESî ya Wanî Fatma Arslane dîyar kerde ke Wan de seba kêmîyê doktoran problemê pîl yenê ciwîyayîş û cinî xizmetêke baş nêeşkenê bigîrê.

 

Nufusê Wanî mîlyonêke derbaz kerdo, şar hetê xizmetê weşîye de probleman ciwîyenê. Eynî wextî de her roje bi seyan welatî bajarê Colemêrg, Agirî, Bedlîs, Muş, Îdîr û qezayê ci yenê Wan seba nêweşxaneyan. La bajar de tena Nêweşxanayê Cigêrayîş û Perwerde yê Herêmî û Nêweşxaneyê Cigêrayîş û Perwerdeyê Dursun Odabaşi yê Yuzuncu Yilî esto û lazimîyê şarî rê qîm nêkeno.

 

'Problemê cidî yenê ciwîyayîş'

 

Sereka SESî ya Wanî Fatma Arslane bale anet ser kêmîyê doktorê welîdnayîşî û nêweşxaneyê cinîyan û va seba nêbîyayîşê doktoran cinî problemê cidî cuyenê û wina va: "Taqîbkerdişê diganî û dermankerdişê peryodîk zaf girîng ê. Bi taybet demê peyîn de nêweşî nêeşkenê randevu bigîrê."

 

'Nêweşxaneyê welidnayîşî de tena 6 doktor estê' 

 

Fatma arde ziwan ke nêweşxaneyê welidnayîşî de tena 6 doktor estê û wina va: "Wexto ke dayeyê zêdebîyayîşê welîdyayîşî verê çiman de bêro girewtene zaf kêm o. No zî nîşan dano ke problem çende cidî yo. Ganî rewşa doktorê ke roje de 100 nêweşan ra ewnîyeno zî verê çiman de bêro girewtene. Wexto ke muracat û dayeyê welidnayîşî bêro girewtene, asayeno ke problem çende cidî yo."

 

'Ma bi aşman nêeşkenê randevu bigîrê'

 

Cinîya bi nameyê Ayten Gulmeze zî da zanayîş ke hûmara poliklînîkê welidnayîşî zaf kêm ê û wina va: "Wan de hûmara doktorê nêweşîyê cinîyan zaf kêm ê. Bi aşman ma nêeşkenê randevu bigîrê. Sebebê nê zî çinbîyayîşê doktoran o. Ma mecbur manenê ke şêrê nêweşxaneyê taybet. No zî butçeyê ma zaf dano zor. Nêweşxaneyê cinîyan zaf girîng ê. Benê sebebê merdişê cinî û domanan zî."