Dîlan Babat

 

ENQERE - Endama Komîsyonê Zindanan ê ÎHDyî Nuray Çevîrmene, dîyar kerde ke hepsîyê zindanê Amasya de grev de yê bêrefakat kerdê hucre û vîtamînê înan nînê dayene. Nuraye da zanayîş ke rewşa înan bi rîsk o û ganî game bêrê eştene.

 

Çalakîya grevê vêşanîye ya Hemsereka Kongereya Komelê Demokratîke (KCD) û parlamentera Partîya Demokratîke ya Şaran (HDP) ya Colemêrgî Leyla Guvene ke bi amancê tecrîdê vera Rayberê PKKyî Abdullah Ocalanî bêro wedartiş dest pêkerde, roja 161in de dewam kena. Pêro zindanan de zî 1ê Adare ra dima bi hezaran hepsî kewtî grev. Dimayê grevan serê hepsîyan de zî teda zêde bî. Endama Komîsyonê Zindanan ê ÎHDyî Nuray Çevîrmene îhlalkerdişê heqan ê prosesê peyîn de şîrove kerde.

 

'Problemê weşîye dewam kenê'

 

Nuraye arde ziwan ke zindanê Anatolya Mîyanên de 26ê Kanûne dima ra grevê vêşanîye yê bêdem û bêagerayîş ameyê destpêkerdene û roja 113ê de yê û wina va: "Zindanê cinîyan ê Sîncanî de koma ewil de problemê weşîye dewam kenê. Hepsîyan 14-12 kîlo dayê. Serê hepsîyê ke grev de yê teda zêde bîyê. Eynî wextî de xeylê zindanan de vîtamînê lazim nêdanê hepsîyan. Amasya de grev 1ê Adare ra dest pêkerdo. Vîtamînê înan nêameyê dayene, hacetê pakîrî nêdayê înan û sabun qîmê înan nêkeno. Pêro hucreyê yew kesî de yenê tepişnayene. Nêzdîbîyayîşê mudirê zindanî negatîf bi. Refakatê înan çinbi. Rewşa weşîye înan her ke şino xira beno. Verê nêdayîşê vîtamînan cezayê dîsîplînî zî yenê dayene. Radyo, televîzyon û rojname nînê dayene."

 

'Cuya înan rîsk de ya'

 

Nuraye dîyar kerde ke hema ke grev nêameyê sewîyeyêka xirab, ganî game bêrê eştene û wina va: "Hepsîyê ke 100 roj pey xo de verdayê estê. Nika hepsî rîskê cu dir rî bi rî yê. Ganî game bêrê eştene. Ganî waştişî lezgînî bi bêrê ca."