WAN - Firina ke hetê hîrê cinîyan ra amî akerdene û nameyê aye kerdî ‘Hanimelî’ bajar de eleqeyêke pîl vînena. Cinîyan bale ante ser girîngîyê ke cinî serê linganê xo de vinderê û wina vatî: "Xeylê firinî hetê camêrdan ra yenê şixulnayîş. La karê wina de cinî hîna pak xebityenê."

 

Cinîyê Wanijî adetê tenûre dewam kenê. Cinî ameyî têhet û wareyê îstîhdamî awan kerdî. Taxa Seyît Fehîm Arvasî ya girêdayê qezaya Îpekyolê Wanî de 3 cinî ameyî têhet û firine bi nameyê ‘Hanimelî’ akerdî. Her hîrê cinî serê siba saete 06.00an de yenê têhet û heta saetê şanî kulînca, nanê lawaş, çoreş û nanê xirtik viraznenê.

 

'Nanê ma eleqeyêke pîl vîneno'

 

Xebatkaran Neslîhan Şahîne wina va: "Ma bi kede xo ekonomîya awan kenê. Nano ke yeno viraştene zî eleqeyêke pîl vîneno. Seba hem bi destê cinîyan yeno amade kerdene û hem zî nanê ma tenûrê tebîî de yenê pewjnayene."

 

'Ez hewceyê mêrdeyê xo nêbena' 

 

Cinîya bi nameyê Nezaket Yarine zî da zanayîş ke her dikano ke bi destê cinîyan abeno zaf pak o û wina va: "Tîya de seba cinîyan xebate zaf rehet û weş a. Xeylê firinan de camêrdî xebityenê. La karê wina de cinî tewr pak xebityenê. Ez ekonomîya xo awan kena. Ez nêewnîyena destê mêrdeyê xo ra. O ewnîyeno cêbê mi ra."