Dîla Babat

 

ENQERE - Denîz Aktaşe ya ESPyije dîyar kerde ke tecrîd tena problemê Kurdan nîyo û ganî vera grevê vêşanîye zêde hîsgêrî bêro ramojnayîş, ganî no xoverdayîş, qêrînayîş bêro vînayene û tecrîd bêro şiknayene.

 

Çalakîya grevê vşanîye hemsereka KCD û parlamentera HDPyî ya Colemêrgî Leyla Guvene ke bi amancê tecrîdê serê Rayberê PKKyî Abdullah Ocalanî bêro wedartiş dest pêkerd, roja 157in de dewam kena. Bi eynî waştişî endamê HDPyî Nasir Yagiz Hewlêr de roja 144an de, Strasbourg de 14 kesî û Galarê de zî Îmam Şîş roja 118an de dewam keno. Hepsîyê ke 16ê Kanûne de dest pêkerdê roja 119an de yê, endama Meclîsa Îştarê Mexmurî Fadîle Tok roja 84an de û ê Yusuf Îba zî Torontoyê  Kandayî de zî roja 92yîn de yo. Çalakîya 3 parlamenterê HDPyî zî Amed de dewam keno.

 

Endama ESP û Meclîsê Cinîyê Sosyalîstan (SKM) Denîz Aktaşe da zanayîş ke ganî vera tecrîdî her kes vengê xo berz bikero.

 

'Cinî û şar binê tecrîd de yê'

 

Denîze arde ziwan ke grev ameyê sewîyeyêke krîtîk û wina va: "Tena şarê Kurd ney heme cinî û şar binê tecrîdî de yê. Ma wazenê no tecrîd ganî bêro şiknayîş. Ewro sosyalîst û pawitoxê heqê merdiman zî grev de yê. Ganî bêro vînayîş ke proses wina nîno meşnayîş. Ganî nê grevî bêrê vînayene."

 

'Ma nêwazenê yew ma ra kêm bibo'

 

Denîzê da zanayîş ke zindanan de vera tecrîdî 7 kesî peynî cuya xo ardî û wina va: "Ma nêwazenê merdişî dewam bikerê û proses de kesêke ma ra kêm bibo. Ganî waştişê înan bêrê vînayîş. Grev ameyê sewîyeyêka krîtîk. Hukmat merdişan ra berpirsîyar o. Seba ke grevê vêşanîye bêrê vînayîş hewl danê. No tena problemê Kurdan nîyo. Çalakîyê fedayî seba ke grev bêrê vînayîş yenê kerdiş. Ma bi endîşeyîn ê. Ganî selahîyetdarî wezîfeyê xo bi ca bîyarê."

 

'Cinîyan sere wedarnayo'

 

Çalakîya grevê vêşanîye bi rayberîya Leyla Guvene amî destpêkerdene, zaf girîng a û wina va: "Yê ke her wext vernîye nê prosesan akerdê cinî yê. Cinî rayberê nê prosesî yê. Cinîyê sosyalîst, temsîlkarê heqê merdiman ê Ewropa, avûkatan dest bi grev kerdî. Prosesê wina de cinîyan destê xo dayê yewbînan. Ganî kes vera xoverdayîşê  zindanan bêveng nêmano. Ganî xoverdayîş bêro vînayene û tecrîd bêro şiknayîş. Ganî ma kesêk bîn kêm nêbê."