COLEMÊRG - Colemêrg de bi germbîyayîşê hewa dir nebatê bi şifa koyan de rengê xo ramojnayî. Cinîyan dîyar kerdî ke nê nebatî penîr de yenê xebitnayîş, sey werd yenê viraştiş û her derdî rê şîfa yê.

 

Bi ameyîşê wisarî dir ganebîyayîşê xoza xo da hîskerdene û têkilîyê cinîyan ê bi xoza dir zî vejîyeno meydan. Cinîyê ke bi serran o adetê xo dewam kenê, dest bi komkerdişê pincarê bi şifa kerdî. Mintiqaya Colemêrgî de nebatê kuhbizik, alo, mende, kîzok, kenger, qehe rengê xo ramojnenê. Cinîyê ke şinê pincar kom kenê zî hem tehmê wisarî û hem zî tehmê têhetbîyayîşê yewbînan vejenê.

 

Cinîyê ke serê siba rew yenê têhet arayî kenê. Dima ra hacetanê xo gênê û şinê. Dimayê rayşîyayîşê derg ra dima pincar kom kenê. Heta şan de turikê xo pirr kenê û ageyrenê.

 

'No nebat her derdî rê derman o'

 

Hamîde Îhtîyat da zanayîş ke her serre pincar kom kena û va: "Wisar zaf weş o. Nîmetê ci estê. Şîfa yo. Verê derman çinbî. Ma derman nebatan ra viraznenê. Eynî wextî de werdê înan zî zaf weş ê. Penîrê ma zî bi nê nebatan tewr weş benê. Ma penîrê xo bi xo viraznenê. No kulturêke vîyarte ra heta nika ewro ameyo yo."