Melîke Aydin

 

 

ÎZMÎR - 24in Fuarê Kitaban ê Îzmîrî dest pêkerd. Seba zêdebîyayîşê vayîye kaxidan, hem çapxane û hem zî wendekarî nêrazî yê.

 

24in Fuarê Kitaban ê TUYAPyî ê Îzmîrî bi 465 weşanxane û sazgehê komelî sivîl ame akerdene. La seba ke krîzê ekonomî û vayîye dovîzî her kes acis bî. Hûmara kesê ke yenê fuar kêm o.

 

Ozlem Tulgaye ke Weşanxaneyê Galeatî bi mêrdeyê xo dir dana xebitnayîş, va serra vîyarte de zêdebîyayîşê dovîzî tesîrêke pîl kerdo, tay kitabî ameyî çapkerdene. Ozleme da zanayîş ke verê bi teqsît pereyê çape ameyne dayene la nika vernê de yeno waştene, vayîye çapî tesîrê vayîye kitaban zî keno.

 

Asuman Atakîşîya ke çapxaneyê aye esto û 24 serrî bi mêrdeyê xo dir Kovara Îzmîr Îzmîr çap kena, arde ziwan ke seba zêdebîyayîşê dovîzî xeylê çapxane ameyê padayîş û dîyar kerde ke bi reklamê şaredarîyan gênê û maeşê teqawîtbîyayîşê karê xo dewam kenê. Asumane wina va: "Sebebêke bîn zî o yo ke şîrketê pîl tesîr serê çapxaneyê qij kenê. Şîrketê pîl bi teknolojî eşkenê hîn erjan berardiş bikerê."

 

'Heqê domanan yê zanayîşî yeno astengkerdene'

 

Hulya Arinçe zî da zanayîş ke seba vayîye zêde yê, nêeşkenê çîyêk bigîrê û wexto ke kitabê seba averşîyayîşê domanan nêrê girewtiş zî heqê domanan yê zanayîşî yeno astengkerdene.

 

Yeşîm Şanli zî arde ziwan ke serra vîyarte de seba domananê xo 10 kitabî girewtê, ganî kitaban ra bac nêro girewtene. Wendekara lîseyî Kader Urune zî da zanayîş ke kesê ke cilanê vayan û telefonê vayan gênê, vayîye kitaban ra gerrekerdox ê û no zî raştî ranêmojneno. Kadere dîyar kerde ke fuar de hîn kêm o cok afuar tercîh kena.