AMED - Hemşaredarê HDPyî yê Bajarê Girdî û 4 qezayê merkezî yê Amedî seba herînayîşê mazbatayanê xo ewro muracatê Heyetê Weçînayîşî yê Amedî kerdbî. Muracat ra ver polîsan awanîya HDPyî ya Amedî girewtî binê ablûqa

 

 Hemşaredarê HDPyî yê Şaredarîya Bajarê Girdî yê Amedî Selçuk Mizrakli û Hulya Alokmen Uyanike, hemşaredarê Yenişehirî Belgîn Diken û Îbrahim Çîçekî, hemşaredarê Peyasê Necati Pîrînççîoglu û Keziban Yilmaze, hemşaredarê Rezan Zeyyat Ceylan û Zubeyde Zumrute, hemşaredarê Sûrî Fîlîz Buluttekin û Cemal Ozdemirî tewrê endamanê meclîsî seba herînayîşê mazbatayanê xo ewro muracatê Heyetê Weçînayîşî yê Amedî kerdbî. Verê ke hemşaredarê HDPyî şêrî mazbatayanê xo bigîrî polîsan awanîya HDPyî yê Amedî girewtî binê ablûqa. Bi seyan polîs, 6 TOMA û wesayîtê zirxî verê awanîya HDPyî de arê bîyî. Polîsan rayîrê verê awanî zî trafîkî ra girewtî.

 

 'Ma do taqîbkerdoxê nê prosesî bibê'

 

Hemşaredar Selçûk Mizrakli qeyûmê ke şaredarîyanê DBP’yî rê ameyîbî tayînkerdene ardî vîrî û va: ‘‘Îradeyê şarî qeyûmî fetinayî. Sey xeylî bajaranê bînan Amed de zî şar rixmê heme zext û xîleyanê îqtîdarî namzedê xo weçînayî û qeyûmî eştî teber. Sere de Amed xeylî cayan de mazbatayê hemşaradaranê ma nênê înan dayene. YSK binşewe reyna qerar girewt ke Stenbol de do 51 sindoqan de reyna weçînitiş do bêro viraştene, la Milazgirê Mûşî ya ke îqîtdar bi ferqê 3 rayan ser kewto de îtîrazî qebûlnêkeno. YSK eşkera hetkarîya xo ya hukmatî ramojneno. Ganî cadê vernîya nê bêhuqûqîye bêro girewtene û helêk cuwa ver mazabatayê ma bêrê dayene.‘‘