MÛŞ/ŞIRNEX - Hemşaredarê Cizîrî Mehmet Zirig û Bêrîvan Kutluya ke weçînayîşê herêmî de se ra 77ê rayan girewtî, mazbataya xo girewtî. Hemşaredarê Gimgimî Ulku Karaaslan û Mahmût Yalçino ke se ra 44.98ê rayan girewtî zî mazbataya xo girewtî.

 

Weçînayîşê herêmî yê 31ê Adare de Namzedê Hmeşaredarîya Partîya Demokratîke ya Şaran (HDP) yê Cizîrî Mehmet Zirig û Bêrîvan Kutluye se ra 77ê rayan girewtî û bîyî hemşaredarê Cizîrî. Mehmet û Berîvane seba teslîmgirewtişê mazbataya xo tewrê parlamenterê HDPyî yê Şirnexî û rayîrberê HDPyî şîyî Dezgeyê Weçînayîşî yê Qeza û mazbataya xo girewtî Mehmet û Berîvane wexto ke şîyî zerre yew bi yew silam dayî xebatkaranê edlîye û hemwelatijan rê serkewtiş waştî.

 

Parlamentera HDPyî ya Şirnexî Nuran Îmîr û Hemşaredarê verên yê Cizîrî Kadîr Konurî nameyê Hemşaredara verên ya Cizîrî Leyla Îmrete ser mazbata dayî Hemşaredar Mehmet û Berîvane û înan rê serkewtiş waştî. Badê teslîmgirewtişê mazbata verê berê edlîye de bi komî fotograf ame antiş û kome derbazê awanîya HDPyî ya qeza bîye. Hemşaredar Mehmet û Berîvane badê saet 13.00î do tewrê hemwelatijan derbazê awanîya Şaredarîya Cizîrî 3 serrî ya hetê qayûmî ra yena îdarekerdene bibî. 

 

Wesayîtê zirxî şaredarî ra vejîyayî Hemşaredarê Partîya Demokratîke ya Şaran (HDP) yê qezaya Gimgimî yê Mûşî Ulku Karaaslan û Mahmût Yalçino ke se ra 44.98ê rayan girewtî û qezenc kerdî, mazbataya xo girewtî. Wexto ke hemşaredar û endamê meclîsê şaredarî kewtî awanîya şaredarî wesayîtê zirxî şaredarî ra vejîyayî. Ulku û Mahmutî dima ra pîrozkerdişan qebûl kerdî.