AMED - Cinîyan reaksîyon vera dewirkerdene awanîya şaredarî rê dayî û vatî: “Ma bimirê zî fek şaredarîya xo ra vera nêdanê. Eke lazim bo ma do çadire verê awanî de ronê, ma do reyna fek vera nêdê. Nê zulm û tedayî ra êdî bes o.”   

 

4ê Sibata 2017an de dimayê ke qayûm tayînê şaredarîya Bismilî bi dima awanîya şaredarî bi awanîya Mudirîyê Emniyetî yê Bismilî dir ame vurnayîş. Awanîya Emniyetî zî dimayê weçînayîşî amî rijnayîş. Şaredarîya Bismilî zî nika awanîya Merkezê Cinîyan de ya. Cinîyan reaksîyon vera xespkerdişê awanîya şaredarî dayî. 

 

‘Mazbatayan nêdanê’  

 

Cinîya bi nameyê Sevda Erdînçe wina va: "Nika awanîya şaredarî xira kenê. Na awanî de keda şarî esta. Cêbe xo ra pere dayê. Bacê ma ra gênê, pereyê ma wenê, ma şarî zî perîşan bîyê. Ma şaredarî qezenc kerd. Ma sey şarî şaredarîyê xo weçîna. Nika zî awanîya ma nêdanê. Ma bê awanî beno? Do heqê ma bidê ma. Çi destê ma ra bêro ma do bikerê. Çi kenê wa bikerê ma fek şaredarî û partîya xo ra vera nêdanê."

 

'Ma fek şaredarîya xo ra vera nêdanê'

 

Mizgîn Çapraze zî arde ziwan verê ke qayûm bêro tayînkerdene qeza de xizmet estbi û va di serrê peyîn de heme rayîr û binsazgehî ameyî rijnayîş û binê awe de mendê. Mizgîne arde ziwan ke awanîya înan çin a la ê fek şaredarîya xo veranêdanê.   

 

Lamîa Demîrcane zî da zanayîş ke ganî zulmê ke înan rê ameyo kerdene peynî bibo û wina va: "Qayûm tayînê şardariyê ma kerdî. Îradeyê ma xesp kerdî. La ma pêwa heme tedayan şaredarîya xo girewt. Nika zî heqê ma nêdanê ma. Destûr nêdanê ma dest bi wezîfeyê xo bikerê. Heta ke ma mifteyê xo nêgîrê ma fek ci ra vera nêdanê. Eke lazim bo ma do verê şaredarî de çadire ronê. No zulm û teda êdî bes o.”