AGIRÎ - Cenazaya Yonca Akiciye ya ke seba protestokerdişê tecrîdê serê Rayberê PKKyî Abdullah Ocalanî Zîndanê Girewteyî yê Cinîyan ê Şakranî de çalakîye viraştebî dewa Bûrnûbûlakî ya qezaya Dûtaxî ya Agirî de amî definkerdene

 

Yonca Akinciya ke çar serrî verî bi sûcdarîya ‘bîyayîşê endama organîzasyonî’ amîbî tepiştene, Zîndanê Girewteyî yê Cinîyan ê Şakranî de 1ê Adare ra nata grevê vêşanîye de bîye. Yoncaye netîceyê çalakîye ke 29ê Adare de viraştebî bi giranî birîndar bîbî, dima ra amîbî berdene bi Nêweşxaneyê Dewlete yê Çîglî û ûca gîrîyabî unîteya ciewnîyayîşî. Yoncaye roja 1ê Nîsane cuya xo vîndî kerdebî.

 

Cenazaya Yoncaye dimayê muameleyanê otopsîye yê Dezgeyê Tibê Edlî (ATK) ra seba definkerdişî sere de bi teyare amî ardene bi Erziromî, dima ra zî bi bejrayîrî amî ardene bi dewa Bûrnûbûlakî ya qezaya Dûtaxî.

 

Cenazaya Yoncaye dimayo ke roja 3ê Nîsane dorê 03.00 de resaye dewa Bûrnûbûlakî binê ablukaya cendirmeyan de hetê keye û merdimanê aye ra amî definkerdene. Leşkeran teberê qismêkê ferdanê keyeyî de çewî rê destûr nêda ke bikewê goristan.