WAN - Cinîyê ke bi omîdê ke pîl, Pasajê Japon ê Wanî de dikan akerdî û bi serran o deştiş kenê pê debara xo kenê. Nika zî seba vayeya qumaşan ameyê sewîyeya ke nêeşkenê kîra û fatureyê xo bidê. Cinîyê terzî ke qezencê înan çin o, dîyar kerdî ke sewîyeya dikanê xo padê.

 

Krîzê ekonomî roj bi roje rewşa esnafan tewr giran keno. Esnafî seba nêeşkenê kîrayê xo vejê mecbur mendê ke dikananê xo padê û xeylê esnafî bi no hewa dikanê xo padanê. Pasajê Japonan ê tarîxî yê Wanî de, esnafê cinî ke nêeşkenê kîra û faturayê xo bidê, reaksîyon vera krîzî ramojnayî.

 

'Vayeyî vejîyayî di qatî, ma zirar kenê'

 

Aysel a ke  7 serrî verê bi omîdêke pîl bi embaza xo dir dikanê terzî akerd û va ê nêeşeknê fatureyê ceyranê xo zî bidê. Aysele da zanayîş ke bi berzbîyayîşê dolarî dir qumaşê ke yenê îthalkerdene nînê girewtene û wina va: "Vayeye qumaşan goreyê serrê verê vejîyayî di qat. Qumaşê verê ma metreyê înan bi 8,5 tL girewtêne nika ma bi 17 TL gênê. Vayeye layî zî zêde bi. Ma verê la bi 3,5 TL girewtêne nika bi 6 TL gênê. Seba nê ma kar nêkenê. Ma kesê ke înan ra qumaş gênê ma vanê ma rê kêm biroşê, vanê ma zirar kenê. Muşteriyê ke yenê vayeyê deştîşî zî vînenê fek ci ra vera danê. Coka wina şêro ma do dikan padê."

 

Cinîya bi nameyê Betul Beştaşe zî da zanayîş ke pere qezenc kenê zî pê hacetan gênê û va: "Pere nêkono cêfê ma. Ma nêeşeknê debara xo bikerê. Kîloyê îsotî bîyo 15 TL. Mutbax de wer êdî nîno amade kerdene."

 

'Kîrayê dikan nêvejîyeno' 

 

Adîle Karataşe zî da zanayîş ke bi omîdêke pîl dikan akerdê û va nika ameyê sewîyeya padayîşî û wina va: "Ma kirayê dikanî zî nêeşeknê vejê. Ganî seba nê krîzî çareserîyêke bêro kerdene."