RIHA - Polîsê ke şaristananê sey Mersîn, Adana, Antalya û Konya ra ameyê kiriştene bi Xelfetî bi hawayêkê teberê qanûnî de rayan şuxulnenê

 

Sindoqa bi hûmara 1094 ya ke Lîseya Anadolu ya qezaya Xelfetî ya Riha de ya xeylî polîsanê Hêzê Çapiksuwarî yê ke Mersîn ra arîyabî raye şuxulnaye. Şertanê normalan de yeno vatene eke memûrêkê/a dewlete do bê sindoqa xo yewna sindoqe de raye bişuxulno ganî ê/aye dir belgeyê fermî yê bi hûmara 142yî estbo, la ame zaneyene ke tu polîsanê ke rayî şuxulnayî dir no belge çinbîyo.

 

Weçînitoxê kirişteyî yê ke vizêr şewe ra tepîya şaristananê sey Mersîn, Adana, Antalya û Konya ra arîyabî ame dîyene ke bi wesayîtanê polîsan arîyayê. Nê mabênî de ame zanayene ke merkezê qeza de zî otobusê zirxinî yê polîsan gêrenê, qeyûm Şeref Albayrak zî dibistanan de keno ke wezîfedaranê sindoqe yê HDPyîyan û muşahîdanê înan vejo teber.

 

Ame vatene ke sindoqê bi hûmara 1049 û 1050î yê ke dibistana mehleya Hîlalli de ameyê ronayene înan de raya eşkeraye yena şuxulnayene.   Mabênê wezîfedaranê sindoqe yê HDPyîyan ê ke waşt mudaxeleyê nê halî bikerê û polîs û wezîfedaranê sindoqe yê AKPyîyan de munaqeşe virazîya.  Dimayo ke wezîfedarê HDPyî û avûkatî kewtî dewre dibistane de dayîşê rayan ame vindarnayene.  Munaqeşeyê mabênê wezîfedaranê sindoqe yê HDPyîyan û yê AKPyîyan de dewam kenê.