ÎZMÎR - Keyeyan bale ante serî hepsîyan ke vera tecrîdî cuya xo dayî û wina vatî: "Tu kes bê sebeb peynîya cuya xo nêano. Verê ke cenazeyî zindanan ra vejîyê peynî tecrîdî bîyarê."

 

Çalakîyê grevê vêşanîye ke bi amancê wedartişê tecrîdê Rayberê PKKyî Abdullah Ocalanî, bi rayberîya parlamentera HDPyî û hemsereka KCDî Leyla Guvene ame destpêkerdene dewam kenê. Heme zindanan de çalakî bi qerar dewam kenê û hepsîyê bi nameyê Zulkuf Gezen, Ayten Beçet, Zehra Saglam û Medya Çinare zî zindanî vera tecrîd peynî cuya xo ardê veng dayî ke ganî wazenê waştişê hepsîyan bi ca bîyarê.

 

'Ganî waştişî înan bêrê qebulkerdene'

 

Hepsîyo bi nameyê Abdulbahrî Yildirimo ke 26 serrî yo zindanê Tîpê Hûmar T-2 ê Şakdarî 1ê Adare de grevê vêşanî de yo, cinîya ey Hanim Yildirime da zanayîş ke 4 serrî mendo ke cezaya Abdulbahrî biqedîyo û va: "Yewin sucê ey Kurdî yo. Waştêne kultur û ziwanê xo bido ciwîyayîş. Seba nê bi serran o zindan de yo."

 

Hanime da zanayîş ke zindanan de verê ke çalakgerî cuya xo bidê ganî waştiş bêrê ca û va: "Domanê ma seba azadî peynî cuya xo ardî. Seba  tecrîd bêro wedartene kewtî grev. Ciwanê ma seba dewaya xo heqdar feda kenê. Dewlete zî nêverdena ke cenazeyê înan bêrê definkerdene. Nê nêzdîbîyayîş dewlete tersena ramojnena. Seba nê tersenê wazenê şar zî biterso. Ma azadîya xo wazenê. Tu kes bi asanî ganê xo nêdano verê mergî. Şima zulmê serê ma de nêvînenê? Ma wazenê serekê ma azad bibo. Heta we azad nêbo kes azad nêbeno."

 

'Şarî ra çareyêke bîn nêverdenê'

 

Yusuf Aydino ke 26 serrî yo hepsîyo Hûmara T-4 ê Şakranî de maneno û cinîya ey Çîçek Aydine da zanayîş ke mêrdeyê aye 53 serrî yo çim, made û çokê xo de probleman cuyeno û wina va: "Mêrdeyê mi grev de nîyo. La o zî tepişnaye yo. Şarê tirkî vengê ma nêeşnawenê. Çapemenî ma nêvînena. Kes bê sebeb xo nêdano verê mergî. Wa no tecrîd êdî peynî bibo."