MÊRDÎN - Hepsîyo bi nameyê Selahattîn Demîr 1ê Adarê de ra zindanê Tîpê T yê Bafrayî de grevê vêşanîye de yo. Cinîya ey Latîfe Demîre da zanayîş ke hepsîyê koma verên ke grev de yê rewşa înan giran a û veng da ganî peynî bidê bêvengî, CPT û îqtîdar berpirsîyarîyê xo bi ca bîyarê. Latîfeye eynî wextî de da zanayîş ke dimayê çalakîya grevê vêşanîye zindanan de îhlalkerdişê heqan di qat zêde bîyo.

 

Çalakîyê grevê vêşanîye bi amancê wedartişê tecrîdê Rayberê PKKyî Abdullah Ocalanî ser o zindanan de ame destpêkerdiş dewam keno. 1ê Adare ra dima hûmara hepsîyê ke kewtî grev resa 7 hezar.

 

Hepsîyo bi nameyê Selahattîn Demîr serra 1992an ra heta nika hepsîyo û bi 30 rojî yo ke grevê vêşanî de yo. Cinîya ey Latîfe Demîre qisey kerde û dîyar kerde ke caardişê  kêfî yê vera hepsîyan bi taybet dimayê grevê vêşanîye hîna zêde bîyî.

 

'Do heta key bêveng bimanê'

 

Latîfeye arde ziwan ke mêrdeyê aye xeylê zindanan de mendo û va bi 7 serrî yo zindanê Tîpê T yê Bafrayê Samsunî de maneno û va: "Pêvînayîşê peynî ê telefonî de va ke do 1ê Adare ra grev de yo. de ye di grevê de yo. 1ê Adare de 6-7 kes kewtê grev, la 60 hepsî ke bi aşaman o kewtê grev estê. Selahattînî va rewşa înan baş nîya. Va rewşa kesê ke 1 Adare ra grev de yê zî ver bi xirabî şina. Ez nêzana selahîyetdarî do heta ça bêveng bimanê. Wa merdimî vengê xo vejê. Mêrdeyê mi va heta tecrîd nêqedîyo do çalakî dewam bikerê."

 

'Wa CPT bêvengîya xo xira bikero'

 

Latîfeye peynî de da zanayîş ke ganî CPT û îqtîdar peynî bidê bêvengî û va: "Wa waştişanê înan bi ca bîyarê. Wa heme dinya bizano ke înançi ant. Ez sey merdima hepsî wazena tecrîd wirzo. No tecrîd serê ma pêro de yo. Ganî CPT bikewo mîyanê tevgeran. Ma destur nêdanê merdişan. Wa êdî cenazeyî zindanan ra nêvejîyê."