ÎZMÎR - Dayîka hepsîyo ke grev de yo Nacîye Guçlu dîyar kerde ke hepsî bi qerar ê û pey waştişanê xo yê û wina va: "Seba bêvengîya komelî domanê ma dest bi grev kerdî. Hema ke ma erey nêmendê ganî her kes reaksîyon ramojno, hukmat ganî game bierzo."

 

Çalakîya grevê vêşanîye ya hemsereka KCD û parlamentera HDPyî ya Colemêrgî Leyla Guvene ke bi amancê tecrîdê Rayberê PKKyî Abdullah Ocalanî ser bêro wedartene dest pêkerde, roja 140ine de dewam kena. Dimayê Leylaye grev vila bi 1ê Adare ra dima heme zindanî beşdar bî, hûmara hepsîyê ke beşdarê grevan bî resa bi hezaran. Zindanê Tîpê F yê Hûmara 2 yê Tekîrdagî Zulkuf Gezen, zindanê Gebzeyî ê Cinîyan Ayten Beçet, zindanê Tîpê T yê Oltu Zehra Saglam, zindanê Tîpê E yê Mêrdînî zî Medya Çinare vera tecrîdî peynî cuya xo arde.

 

'Hepsî bi qerarê, pey waştişanê xo yê'

 

Ozgur Guçluyo ke zindanê Tîpê T-3 ê Şakranê Alîaga de maneno, bi sebebê ‘endamîyê rêxistine’, ‘zirar dayo malê îstîmlakî' rastê ceza ame. 2011an de roja ke kewtib 18 serre yê xo ame tepiştiş û o zî 1ê Adare ra heta nika kewto grevê vêşanîye bêdem û bêagerayîş.

 

Dayîka ey Nacîye Guçlu ke hewteyê vîyarte de şî pêvînayîşê ey wina va: "Serra vîyarte de vera zulmê dewlete kewt grev. Nika reyna grev de yo. Moralê ey baş o la 6 kîlo dayo. Xora newe grevê vêşanîye 10 rojan ra vejîyabi. Roja bîn reyna dewam kerd. Domanê ma pey waştişanê xo yê. Ganî tecrîd bêro wedartiş. Ma nêwazenê domanê ma verê çimanê ma de bihelîyê. Dewlete senîn nê nêvînena?"

 

Nacîyeye dewam de da zanayîş ke heme kesê ke grev de yê sey lajê aye yê û wina va: "Ganî her kes werzo serê payan. Ganî veng bidê vengê înan. Ganî dewlete gaman bierzo. Zulkuf Gezen vera tecrîdî peynî cuya xo ard. Cenaza ey remnayî û nîmeyî şewe defin kerdî. Gelo nê ra tewr pîl zulm esto? Ez xo kena vera înan. Gelo dejêke wina pîl esto? Ma dayik ê, ma bi zor û zehmetî domanê xo wey kerdî."

 

'Asîyeno tedayî giranê ke kewtê grev'

 

Nacîyeye arde ziwan ke pêvînayîş de moralê Ozgurî baş bîyo û va: "Zere de çi yeno cuyayîş ma nêzanê. Hûmara koxuşan zêde ya. Reyan erd de rakewenê. Asîyeno ke rewşa înan xirab a û binê tedayan de kewtê grev. Faşîzm teber de yeno ciwîyayîş, tewr xirab zindanan de yeno ciwîyayîş. Ganî her kes reaksîyon ramojno. Ganî vengê xo vejê û ganî hukmat game bierzo."