Zeynep Durgut

 

WAN - Çalakîya grevê vêşanîye ke hetê Leyla Guvene ra ameya destpêkerdene zindanan de dewam kenê. Ayten Beçeta ke Zindanê Cinîyan ê Gebzeyî de tewqîfkerde bî seba wedartişê tecrîdê Rayberê PKKyî Abdullah Ocalanî ser peynî bibo, peynî cuya xo arde. Cinîyê Wanî reaksîyon nîşanê bêvengîya hukmatî dayî û vatî ke her mergêke ra hukmat berpirsîyar o.

 

Çalakîya grevê vêşanîye ke hetê Hemsereka Kongreya Komela Demokratîke (KCD) û Parlementera Partîya Demokratîke ya Şaran Leyla Guvene ra ameya destpêkerdene 139an de dewam kena. Çalakîya grevê vêşanîye ke pêruyê zindana de ameya destpêkerdene zî bêmabên dewam kenê. Seba şermezarkerdişê tecrîdê Rayberê PKKyî Abdullah Ocalanî ser o hepsîyo sîyasî Zulkuf Gezenî zindanê Tekîrdagî de peynî cuya xo ardib. Dimayê ey bi eynî amancî zindanê Cinîyan ê Gebzeyî de Ayten Beçete Oltuyî de Zehra Sağlame, zindanê Tîpê E yê Mêrdînî de zî Medya Çınare  bi eynî amancî peynî cuya xo ardî. Cinîyê Wanî reaksîyon nîşanê bêvengîye hukmatî dayî û veng dayî her kesî ke vera çalakîyê fedaî bêveng nêmanê.

 

'Sere wedarnê bêveng memanê'

 

Cinîyan ra Derya Demîrcane arde ziwan ke her ameyîşê xebera mergî ra hukmat berpirsyaro, vêşanîye ney bêvengî kişena û wina va: "Grevê vêşanîye seba xelisnayîşê rûmetê şarê Kurd ameyo destpêkerdene. Cinîyê ke rayberîya nê xoverdayîşî kenê, ez înan selam kena. Ez bi rêzdarî çalakîya Ayten Beçet û hevalanê aye selam kena. Tena yew ney bi hezaran Ayten, Zulkuf, Zehra û Medya estê ke zindanan de xo ver danê. Şarê kurd bi serran o vera zulmî têkoşîn kenê. Nika domanê ma grev de yê û tena nê 4 rojî de 4 cenazeyî zindanan ra ameyî. Vera girankerdişê tecrîdî, ciwanî zî çalakîyê fedaî kenê. No zulm do heta ça dewam bikero? Ganî no zulm peynî bibo. Çir aşar vera xoverdayîşê zindanan de bêveng o? Vêşanîye ney bêvengî kişena. Sere wedarnê, bêveng memanê"

 

'Bi hezeran Ayten, Zehra, Medya û Zulkuf xo ver danê'

 

Taybet Ersoze zî bale ante serê çalakîyê grevê vêşanîye û va ke şarê Kurd têkoşînê zindanan pîl bikero û wina va: "Heta ça do no zulm dewam bikero? Wa her kes çimê xo abikero û bi wijdan têbigeyro. Wext wextê bêvengîye nîyo. Bêvengî merg ano. Hukmat bêwîjdan o û bêîman o. Cewabdayîşê waştişan hende zehmet nîyo. Roj bêro do vera merdimayî hesap bidê. Hukmat çiqas xo bêveng bikero, do têkoşînê ma zî hende zêde bibo. Nika bi hezaran Ayten, Zehra, Medya û Zulkuf xo ver danê. Biciwîyo xoverdayîşê zindanan.” 

 

'Bi bêvengî nêeşkenê vernîya wisar û azadî bigîrê'

 

Hasine Uçare dîyar kerde ke ê do vera zulmî qetî sere nêtewênê û wina va: "Tena dilopêke gonî ganê ma de bimano zî ma do xover bidê û ma do vera zulmê Erdoganî sere nêtewênê. Ma heta peynî piştdayîş danê xoverdayîşê zindanan. Waştişê înan waştişêke meşru yo. Hukmat bi zanabîyayîş xo bêveng keno. La wa bizanê ke ê do bêvengî nêeşkê vernîya ameyîşê wisar û azadî bigîrê. Laj û kênayê ma mil bi mil  xo ver danê û pey înan de yê. Erey memanê veng bidê xoverdayîşê zindanan."

 

'Ganî her kes bi ruhê Zulkuf, Ayten, Zehra û Medyayan têkoşîn bikero'

 

Esmer Armane zî reaksîyon vera bêvengîya hukmatî da û veng da her kesî ke bêveng nêmanê û wina va: "Ez rayberîya xoverdayîşê Leyla Guvene selam kena. Bi zulm do nêeşkê xoverdayîşê ma bidê vindernayîş. Hukmat bi bêvengîya xo merdiş tesdîq keno. Dewaya ma dewaya heqîqetî ya û waştişê ma waştişê merdimayî yê. Ganî her kes bi ruhê Zulkuf,  Ayten, Zehra û Medyayan têkoşîn bikero. Ma dayîş taqîbkerdoxê xoverdayîşê domananê xo yê. Ma do serkewte bibê. Bêveng memanê bêvengî merg o."