ŞIRNEX - Emîne Kabula ke seba laj xo yê ke 100 rojî yo grevê vêşanî de yo û seba hepsîyê bînan vengdayîş kerde û dîyar kerde ke hem ake erey nîyo çi lazimo wa bikerê û va: "Her kes bêveng o û tena temaşe kenê. Êdî bes o. wa her kes herra mergî serê xo ra bierzê."

 

Bi amancê tecrîdê Rayberê PKKyî Abdullah Ocalanî ser o bêro wedartene, zindanê herêm û Tirkîya de nêzdîyê 7 hezar hepsî kewtî grevê vêşanîye û çalakîya înan dewam kena. Keyeyê hepsîyan girtî veng dayî raya pêroyî ke bêvengî peynî bibo.  

 

Dayîka Omer Kabulî ke Zindanê Tîpê L yê Panosî yê Agirî de maneno û roja 100î grevî de yo, Emîne Kabule veng da heme kîştan ke wa veng bidê waştişê heqdar.

 

'Omerê mi 100 rojî yo grev de yo'

 

Emîneye da zanayîş ke lajê aye 100 rojî yo grev de yo û nêeşkeno vejîyo pêvînayîşê telefonî zî û va: "Seba problemê mi weşîye zî bi aşman o nêeşkena şîrî pêvînayîş. Lajê mi 100 rojî yo grev de yo. Ma rojêke werd nêwerê ma tesîr benê. Ê mîyanê çar dêsan de xo ver danê. Bi hezaran hepsî bi rojan o mîyanê dêsan de yê kes vengê înan nêşinaweno. Bê suc kewtê zindan. Nika zî seba wedartişê tecrîdê serê ma pêrune têkoşîn kenê. Wazenê aştî bêro. Ma zî wazenê. Waştişê înan waştişê ma yo."

 

'Her kes temaşe keno'

 

Emîneye dewam de da zanayîş ke dewlete zîhnîyetê xo yê hêrişî dana meydan û wina va: "Ma êdî şaş nêmanê. Dewlete her wext vera kesê ke veng vejenê bêveng manena. Ganî ma sey dayîk sey şar vera nê vinderê. Her kes bêveng o. Her kes bêveng çîyê ke yenê cuyayîş temaşe kenê. Ma zindanan ra nêwazenê xebera mergan bigîrê. Wa her kes herra mergî serê xo ra bierzê."

 

'Moralê înan baş o'

 

Emîneye peynîya qiseykerdişê xo de arde ziwan ke rewşa hepsîyan baş nîya û win ava: "Çermê lajê mi zaf tenik bîyo. Kîlo dabi.  Heme hepsî rewşa înan baş nîya. Tena lajê mi ney pêro hepsî sey yewbînan ê. Heme domanê ma yê. Nika ma ma nêzanê rewşa înan senîn a. Ma nêzanê ke se kenê, wexto ke weşîya înan xira bena seba înan se kenê. Rewşa weşîya înan baş nîya, la moralê înan baş o. Hîna ke rewşe zêde xira nêbîya ganî çareserî bêrê kerdene."