AMED - Çalakîya grevê vêşanîye yê bêdem û anêgêrayîşî yê Hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî dest pêkerdiş roja 138ine de dewam kena.    

 

Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 138ine de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Serdayîşê seba Leylaye dewam kenê û ablûqayê polîsan verê keyeyê aye zî hîna dewam keno. dimayê Leylaye bi eynî waştişî Mintiqaya Federalê Kurdistanî çalakîya Temsîlkarê HDPyî Nasir Yagizî roja 125an de, Strasbourgî de 14 kes û Gallerî de zî Îmam Şîşî roja 99 de dewam keno. Endama Meclîsê Îştarî Fadîle Toke roja 65ine de ya. Hemsereka DBPyî ya verê Sebahat Tuncel û ya parlamentera HDPyî ya verê Selma Irmake ke zindan de dayê destpêkerdiş roja 69in de yê û bajarê Toronto ê Kanadayî de zî çalakîya Yusuf Îba ke dayo destpêkerdene roja 72 de dewam keno. Heto bîn ra çalakîya hepsîyê ke grevê vêşanîye ê koma yewine roja 99ine de û çalakîya hepsîyan 1ê Adare ra dima heme zindanan de vila bî.   

 

Awanîya HDPî ya bajarî de çalakîya nobetî amî destpêkerdene      

 

Çalakîya ke parlamentera HDPyî Dêrsim Dag 3yê Adare de da destpêkerdene û Parlamenterê Wanî Tayîp Temel û Murat Sarisaç ke 8ê Adare de dest pêkerdî zî dewam kenê. Bi parlamenteran dir zî endamê partî ra Îsmet Yildiz, Sevîcan Yaşar, Salîh Tekîn û Bîlal Ozgezer dimayê eştişê awanî ser ameyî tepiştiş û dima ra zî ameyî tewqîfkerdiş, seba Salîh Cansever, Abdulhalik Kurt û Yusuf Ataş zî cezaya hepsê keyeyî ame dayene û çalakîya xo dewam kenê.   

 

Eynî wextî de xeylê kes seba piştdayîşî bi çalakîya parlamenteran dir awanîya HDPyî ya Amedî de dest bi çalakîya nobetî ke do 2 rojan dewam bikerê kerdî.   

 

Kesê ke ameyî tahlîyekerdene keye de çalakîya xo dewam kenê  

 

Hepsîyan ra Sedat Akino ke Erzîcan de Tîpê T de dest bi grev kerdib dimayê ke ame tehliyekerdiş çalakiya xo keye de roja 78in de dewam keno. Gurbet Ektirena ke 15ê çele de dest bi çalakiya grev kerde û dima ra amî tahliyekerdiş zî 8ê Adare de çalakîya xo keyeyê xo Dêrikê Mêrdînî de dewam kena û roja 69in grevê vêşanîye de ya. Sema Akane zî 14ê Adare de amî tahliyekerdene û çalakîya aye keye de dewam kena roja 80ine de dewam kena.  

 

110 kesê ke bale antî tecrîdî ser tepişnayeyê

 

Newroza Amedî ya ke bi sloganê "Ma do teqez bi serkewtebê, tecrîd bişkînê" hetê sehezaran ra ame pîrozkerdene û sloganê vera tecrîdî ameyî berzkerdene. Bi taybet sloganê "Bicuyo Serek Apo" ame berzkerdene. Ame zanayîş ke 110 kesî Newroze de ameyê tepiştiş. Kesê ke ameyê tepiştiş hîna Mudirê Emniyetê Amedî de tepişnayeyê.

 

14 cinîyê ke 'Çalakiya vindernayene' kerdî hepsê keyeyî

 

 

Heto bîn ra 14 cinîyê aktivîstê TJAyî yê ke Kuçeyê Hunerî yê Ofisê Yenişehirê Amedî de rayîr padayî û çalakîya vindernayîşê kerdî ameybî tepiştiş. Cinîyê ke 5 rojan tepişnaye mendî dimayê ke vetî dadgehe bi cezaya hepsê keyeyî ameyî cezakerdene. Dadgehe sebebê ceza hîna eşkera nêkerde.

 

Hepsîya bi nameyê Zehra Saglame vera tecrîdî peynî cuya xo arde

 

Erzirom de Zindanê Cinîyan ê Oltu yê Tîpê T de hepsîya bi nameyê Zehra Saglame vera tecrîdê Rayberê PKKyî Abdullah Ocalanî ser peynî cuya xo arde. Cenazeya Zehra hetê cendirmeyan ra amî desteserkerdiş û ardî Gimgimê Muşî dewa Xinzor de defin kerdî. 

 

17ê Adare de Zindanê Tekîrdagî yê Tîpê F  Hûmara 2 Zulkuf Gezenî vera tecrîdî peynî cuya xo ard, 23yê Adare de Zindanê Cinîyan ê Gebzeyî de Ayten Becete vera tecrîdî peynî cuya xo arde.